Jt. Production hla thar a mawi lehpek

Mizo lengzem singer mipa zinga tunlaia huhang ngah ber zinga mi Jt. Production chuan Thawhṭanni, Valentine's Day khan hla thar mawi tak mai 'A thûk tawh' a tichhuak.

'A thûk tawh' hi a hla dang ṭhenkhat ang bawkin a lungrunin hla lungkuai tak a ni. Jt-a hian music video mawi tak leh hmuh nuam tak, awmze nei tak nen a hla thar hi a tichhuak a, a hla a mawiin a sa thiam bawk nen, ngaihthlak pawh a manhla hle.

Zonet lama a tihchhuah bakah YouTube lamah a dah chhuak nghal bawk a, thlirtu pawh an pung chakin darkar 18 chhungin mi sing ruk dawnin an thlir hman der.

Tluanga Hnamte (Westend Studio) chuan music a produce a, video erawh Moonshine Studio kut chhuak a ni thung.

Jt. Production hi a hla thar tihchhuah apiang a hit zel ti ila kan sawi sual awm lo e. Tuna a hla thar tihchhuah pawh hi a 'hit' leh viau ang tih a rinawm a, Jt-a zai ngainatu i nih a, i lo la ngaithla lo a nih chuan ngaihven chi hle ang. Spotify lamah pawh a chhawp chhuak nghal a ni.