Global Excl. US-ah GAYLE 'abcdefu' Pakhatna a ni leh

Chart ngaihven hlawh zualah Encanto a la langsar zel

Billboard chart ngaihven hlawh zual pahnih Billboard 200 chart leh Hot 100 chart bakah Global 200 Chart-ah pawh Encanto bawk a la langsar. Hetihlai hian Global Excl. US chart lamah erawh GAYLE chuan a hla hit 'abcdefu' chu pakhatna a nihpui leh.

GAYLE leh 'abcdefu'

a hit rei tawh

American singer GAYLE hian a hla hit 'abcdefu' hi nikum August 13-a a tihchhuah daih tawh kha a ni a, tunkar chart thlengin Billboard Global Excl. US chart-ah hian pakhatna a la nihpui thei.

Global Excl. US chart-ah hian kar 13 lai a lang tawh a, tunkar chart-ah hian a vawi rukna atan pakhatna a ni leh. Global 200 Chart-ah pawh vawi 13 tho lang tawhin vawi hnih pakhatna a ni ve tawh bawk.

US single chart ngaihhlut Billboard Hot 100 chart lamah erawh a thlen san ber ṭumin parukna a ni a, vawi 12 chart-ah lang tawhin tunkarah hian pasarihna a ni thung. Hetihlai hian ram hrang hrang- Austria, Finland, Germany, Ireland, Israel, Malaysia, Norway, Sweden, Switzerland, leh United Kingdom-ahte chuan an single chart-ah topper a ni vek

tawh thung.

GAYLE-i'n major-label inremna a ziahpui hnuah 'abcdefu' hi a single hmasa ber a ni a, kum 17 mi singer, a hming tak Taylor Gayle Rutherford hi Atlantic Records chuan inremna ziahpuiin January thla khan hla dang 'Ur Just Horny' chu a tichhuak leh tawh bawk a ni.

Encanto a la langsar zel

Billboard 200 chart-ah 'Encanto Soundtrack' bawkin ro a rel leh a, kar nga chu he chart-ah hian (a zawn ni loin) ro a rel ta a ni.

Gunna album thar ber 'DS4EVER' chu pahnihna niin Yo Gotti album thar 'CM10: Free Game' chu pathumna a ni thung. Morgan Wallen 'Dangerous: The Double Album' chu tlangzarhna rei tawh hle mah se palinaah a la awm vang a, Mitski chuan a album thar 'Laurel Hell' hmangin top 5 a khar.

The Hot 100 chart lamah pawh Encanto bawk langsar lehin Carolina Gaitan, Mauro Castillo, Adassa, Rhenzy Feliz, Diane Guerrero, Stephanie Beatriz & Encanto Cast 'We Don't Talk About Bruno' chu kar thumna atan pakhatna a ni leh. Nicki Minaj X Lil Baby 'Do We Have A Problem?' chu rawn hit chho viau mah se pakhatna a ni phak lo. Adele 'Easy on Me' chu pathumna a la ni ve bawk a, Radio Songs chart lamah erawh he hla hi la hit zelin kar 12 pakhatna a ni tawh.

Artist 100

Artist 100 chart lamah chuan kar hmasa ang bawkin The Weeknd pakhatna a ni leh a, British singer pahnih Adele leh Ed Sheeran-te chuan dawtin pahnihna leh pathumna an ni ve leh bawk. Doja Cat chu palina a ni a, Lil Baby chu pangana a ni ve bawk.