Super Bowl Halftime Show penṭawng

2022 Super Bowl halftime show sawizui hlawh tak, mi tam takin Super Bowl halftime show ropui ber ni hiala an ngaih chu artist inlante'n an chhawr zui a, an hlate rawn sakte pawh hla thar ni lem lo hlawm mah se a lar thar leh hlawm viau.

Dr. Dre leh Snoop Dogg-te hla kum 1999-a tihchhuah 'Still D.R.E' chu YouTube lamah a lar thar leh viau. Thlirtu tluklehdingawn a nei tling der mai. Hip Hop legend pahnih hian video thlirtu tluklehdingawn nei tling an la nei ngai loa, 'Still D.R.E' hmang hian mellung pawimawh bik an phum.

He video hi October 2011 khan YouTube-ah upload a ni a, kum 10 chuang hnuah hetiang zat hi thlirtu a rawn nei ta a ni.

Chutichuan...

2022 Super Bowl halftime show-a Dr. Dre leh a ṭhiante perform hla ho khan US-ah chuan on-demand stream (audio leh video belhkhawm)-ah vawi maktaduai 18.64 zet Pathianni leh Thawhṭanniah ringawt khan an stream niin MRC Data chuan a tarlang.

Khang hlate kha Super Bowl halftime show hma ni kha chuan vawi mtd 8.42 vel stream a ni a, Thawhṭanni a liam meuh kha chuan 121% zetin stream a pung. 'Still D.R.E' chu an stream tam ber niin vawi mtd 3.7 an stream a ni.