'Elden Ring' PC System Requirement an hriat ta e

Kumin chhunga game tlangzarh tur zinga ngaihven hlawh ber pawl 'Elden Ring' chu karleh lamah hian an tlangzarh tawh dawn a, developer FromSotfware pawhin PC System Requirement an tarlang ta.

Open world action role-playing game ngaihven hlawh 'Elden Ring' hi February 25 hian tlangzarh a ni dawn a, PC mai bakah PS4, PS5, Xbox One, leh Xbox Series S/X-ahte pawh khelh theihin an tlangzarh dawn bawk a ni. PC gamer tan chuan Rs 2,499 velin a lei theih dawn a, Deluxe Edition erawh Steam lamah Rs 2,999-in an zuar thung. Xbox leh PlayStation Store lamah erawh Rs 3,999-in an zuar a ni.

'Elden Ring' hi fantasy novelist, Game of Thrones vanga hriat hlawh tak George R. R. Martin thawhpuia an siam a ni a, 'Dark Souls' game series director Hidetaka Miyazaki chuan a direct leh bawk.

He game hi khelh i tum a nih chuan free disk space 60 GB tal i neih a ngai dawn a, DirectX 12 (feature level 12.0/ WDDM 2.0) i neih a ngai dawn bawk. Minimum system requirement chu a sang lutuk lem loa, mi nawlpui tan pawh neih theih tur a nih laiin recommended specification erawh a sang angreng hle.