Olivia Rodrigo: Driving Home 2 U (a SOUR film) Documentary film tichhuak dawn

Olivia Rodrigo documentary 'Olivia Rodrigo: Driving Home 2 U (a SOUR film)' chu March 25 hian Disney+-ah tihchhuah a ni dawn a, trailer pawh hmuh tur a awm tawh a ni.

Driving Home 2 U-ah chuan
Documentary title aṭang pawhin eng lam hawi nge a nih dawn chu a hriat thei maiin a rinawm.

Thuchhuah an siamah tarlan a nih dan chuan he documentary-ah hian Rodrigo chuan thlirtute chu Salt Lake City aṭanga Los Angeles thleng road trip a neihpui dawn a, Grammy-nominated debut record a siam dante chipchiar taka sawiin, khatih hunlaia a nunkawng zawha a rilrua thu awmte a sawi dawn.

He film-ah hian a mimal chanchin bakah behind-the-scene footage ṭhenkhat bakah video kan la hmuh ngai loh, studio chhung mai bakah pawn lama a hunhman dante pawh tarlan a ni dawn a, interview ṭhenkhat dahtel a ni bawk.

Rodrigo film-ah hian a multi-platinum track 'Good 4 U' leh 'Deja Vu' arrangement thara a sak dah tel a ni dawn a, live performance 11 bakah guest artist- Jacob Collier, Blu DeTiger leh Towa Bird-te pawh an inlan dawn. Olivia Rodrigo fan-te tan chuan he documentary hi en a manhla hle ang.

Olivia Rodrigo hi
- Grammy award-ah kumin hian a hming a vawi khatna atan a lang. Nomination pasarih a hmu nghal!

- Time magazine chuan '2021 Entertainer of the Year'-ah a puang.

- Billboard chuan '2022 Woman of the Year'-ah a puang.

Kum 2020-a kan hriat ngai loh, 2021-a a hming kan lam zin ber pawl!
Kum 2020 kha chuan Olivia Rodrigo hi tunge a ni tih hria pawh an la tlem hle. Disney+ show 'High School Musical: The Musical: The Series' en ngai lo tan phei chuan han hriat vak chhan tur pawh a awm lo. Mahse, kum 2021 kumtir te, January 8 khan a debut single 'Drivers license' chu rawn tichhuakin, chumi ni aṭang chuan a nun thlak danglamin a awm a, khawvela zaithiam lar ber zinga mi kar loah a ni nghal! A hla hi a hit bawk a, record eng emaw zat a siam zui nghal a ni kha.

Chutah le, thla tam pawh a liam hmain a album hmasa ber 'SOUR' chu tlangzarh lehin Billboard 200 chart-ah topper a rawn ni nghal a, US bakah ram dang eng emaw zatah he album hi chart topper niin Spotify lamah pawh record a rawn siam nghal mawlh mawlh mai bawk a, kum hnih liam taa tunge a nih hretu awm mang lo kha, tunah chuan Grammy Awards-ah nomination eng emaw zat hmuin award eng emaw zat dawng tura beisei san pawl a ni tawh.