Lunglei-ah 'Thingtlang Tlangval' tlangzarh dawn ; October 27 aṭangin Aizawl leh hmun dangah chhuah theih beisei

Tun hnaiah Mizo Film chhuak thar a awm nual a, musical film chhuak thar tur a la awm cheu bawk. Israel Lalbiakrema, H. Vanlalhlimpui leh Bethsy Lalrinsangi te channa, 'Thingtlang Tlangval' chu October 25 hian Lunglei-ah tlangzarh a ni dawn ta.

He musical film hi October 27 aṭangin Aizawl-ah en tur a awm dawn a, hmun hrang hrangah chuah chhoh a ni zui dawn bawk a ni.

A 'hit' dawn
Kar kalta Zirtawpni zan khan DJ Lalvenhimi musical film 'Ni Thar Duhawm' chu Vanapa Hall-ah tlangzarh a lo ni tawh a, a hmunah entu mipui an khat ṭha hle. Mizo-te'n film industry-ah nasa takin hma kan sawn a, chu chu a takin a lang.

Malsawma (M_Space) leh Mapuia (Leitlang Pictures) te inkawpin film an siam 'Thingtlang Tlangval' pawh hi en chawkawm tawh tak a ni a, social media lamah phei chuan a 'hit' rem rem tawh hle.

OST teaser tawite tihchhuah a ni a, social media lamah a lar hle. OST hi pahnih a awm dawn a, H. Vanlalhlimpuii'n a sak 'Ṭhian rinawm' tih leh, Israel Lalbiakrema leh Sangtei Khawlhring ten thiam taka an sak 'A kim ngei ang' tih te a ni. OST hi tunkar hian official-a tihchhuah a ni dawn a, film trailer pawh hmuh tur a awm thuai dawn a ni.

Lunglei lamin an hlut
'Thingtlang Tlangval' film hi September thla khan shoot zawh a ni a, Lunglei lamin en hmasa-a ṭan an duh. An beisei ang ngeiin October 25 hian Convention Center, Rahsiveng-ah tlangzarh a ni dawn a, a tuk zanah chhuah chhunzawm a ni dawn bawk.

Tlangzarh zan hian a chang­tute pualin hun hman a ni dawn a, sawmbik leh an chungte bakah mi dang tan seat tlem a awm dawn. Convention Center-ah hian mi 200 vel chauh an len avangin tlangzarh zan hian an en vek thei dawn lo a, a tuk zanah Gov't High School kawt Chanmari-ah a duh a piang tan en theihin a awm dawn thung a ni.

Film kal phung...
'Thingtlang tlangval' hi musical film niin, a changtute pawh zaithiam lar tak tak te an ni nawk. Israel Lalbiakrema, H. Vanlalhlimpui leh Bethsy Lalrinsangi te chu he film-ah hian an inlan a, lemchan khawvela hnuhman nei ṭha tak - Rosangpuii (Damna Kim), Papuia Pachuau (Scooty), Mimi K.Lalnunfeli (Anabaino) te hmel hmuh tur a awm dawn bawk.

'Thingtlang tlangval' hi hmeithai fa, thingtlang aṭanga Aizawla college kal, a nuna harsatna leh buaina tam tak tawk chanchin tarlanna a ni.

Booking lam hi
Mipui lam aṭangin nawrna a nasat avangin tlangzarh ni tur pawh hriat a nih hma hauhin booking hawn a ngai hial! Booking hi 100 chuang zet a awm tawh a, Zoram a tuam chhuak hneh hle dawn niin a lang.

Pawl leh mimal anga sum tuak nana hmang duh tan -7630037253-ah booking tih theih reng a la ni bawk.