Hontrade International Ṭhazual Lengzem ; Dinhmun sang berah Rachel Lalnunkimi
Hontrade International Ṭhazual Lengzem chart-ah No.1 hautu thar a awm a, a hming chu Rachel Lalnunkimi a ni. Mizo Idol star hian a hla thar 'Mai a lum e' tih hla hmangin dinhmun sang ber a luah a ni.
Rachel a invawrh
Mizo Idol aṭangin mipuiin an hmelhriat Rachel Lalnunkimi hi rimawi khawvelah hun eng emaw chen a thawm a reh deuh vang vang a, tunah erawh chuan sang takah a rawn invawrh leh ta.
Venghlui nula hian August thla khan MPL kick-off-ah a music video thar 'Mai a lum e' tih chu a tlangzarh a, a lar chho nghal hat. Ni tam pawh a liam hmain Ṭhazual chart-ah hmuh tur a awm nghal a, dinhmun sang ber luan turin hun a mamawh tam lo. October thla a herchhuah meuh chuan 'Mai a lum e' tih hla hmang hian No.1 a rawn hauh ta a ni.
He hla mawi dangdai tak mai hi Mystic Sailo phuah niin, kumina Rachel-i music video hmasa ber a ni. Video hi Roar Video Production (Atea) kutchhuak niin, hmuh a nuam hle a ni.
Marina-i'n a daih rei
Folk-song lam a sak hnua rawn lar thar leh mek, Marina Vanhriatpuii Varte chuan pahnihna a hauh a, top chart-ah a lang rei ta hle. Marina-i hian 'All In' tih chu a hlawhtlinpui zui zel a, tunlai hla lar leh thlan hlawh ber te zinga mi a ni.
Mizo Idol star hian 'All In' album a tichhuak a, a album title hi Ṭhazual chart-ah hun rei tak chhung a lang tawh a ni.
Tun ṭumah hian Zorinzuali Khiangte chu pathumna-ah a awm a, Zauvi chuan a dawt a ni. Zorini hian No.1 a lo hauhpui tawh 'Min hnawl si maw' chu a hlawhtlinpui zui zel a, hla thar a tichhuak leh tawh bawk.
Josephine Lalawmpuii chu 'Duhaisam Di ' tih hla hmangin pangana-ah a awm a, Manuna & Feli Fanai te chuan 'I leng dun zel ang' tih hla hmangin parukna an hauh.
Top 10-ah hian Jenny Jathang, Noel Hrahsel leh Aziri te chu an lang bawk a ni.
Hontrade International Ṭhazual Lengzem Top 10
1. Rachel Lalnunkimi - Mai a lum e
2. Marina V. Varte - All In
3. Zorinzuali Khiangte - Min hnawl si maw
4. Zauvi - Thenrual Hlui
5. Josephine Lalawmpuii - Duhaisam Di
6. Manuna & Feli Fanai - I leng dun zel ang
7. Jenny Jathang - Tuarthiam rawh aw
8. Noel Hrahsel - Aw 'D'
9. Aziri - Hmangaihna
10. Mimi Lalhruaitluangi - Hrangmi Huaisen