Ellen DeGeneres Show-ah Thai soccer team te inlan

Kumin July thla khan Thailand-a puk pakhat, Tham Luang cave-ah Thai soccer team Wild Boars player leh coach te chu an tang a, ni eng emaw zat hnuah chhanchhuah an ni. An chanchin hi khawvelin a ngaihven a, tun thleng pawhin an chanchin hi mi tam tak ngaihven a la ni.

Tun hnai khan Wild Boars player 12 leh an coach Ekkapol Ake Chantawong te chu The Ellen DeGeneres Show-ah a inlan a, lawm an hlawh hle. Team coach Ake chuan, "Naupangte kha a tirah chuan an mangang ve hle a, theihtawpin ka thlamuan a ni. A hnuah chuan him takin chhanchhuah an ni ngei an tih an inbeisei a, thla muang takin an awm thei ta a ni," tiin, hun khirh tak an paltlang chanchin a sawi.

Ake chuan sawi zawm­in,"Puk chhung aṭang khan kan chhuak thei lo a nih pawhin mi tute emaw an lo lut ang a, min lachhuak thei ngei ang tih kan ring tlat a ni," tiin, beiseina sang tak nen chhanchhuah an nih hun an nghah chanchin a sawi. Him taka chhanchhuah an nih avangin an lawm tak zet tih a sawi a, "A ropui lutuk a, sawifiah thiam pawh a harsa zawk hial a ni," a ti bawk.

Wild Boars coach hian naupang te nen hian Tham Luang cave hi an la tlawh leh lo tih sawiin, a hmunah engtiang chiah nge a nih en leh an tum tih a sawi. Chutih rual chuan puk chhunga luh leh erawh tumna an nei tawh lo tih sawiin, "Naupang ṭhenkhat hi chuan puk luh hi a hlauhin an hlau tawh a ni," a ti bawk.

Thai soccer team Wild Boars player 12 leh coach te hi Tham Luang cave-ah hian ni 20 vel zet an tang a, a hnuah him taka chhanchhuah an ni.