Box Office ; Venmon khum thei la awm lo

English actor Tom Hardy channa 'Venom' chu North America Box Office-ah khum thei an la awm lo. Venom hian kar liam ta chhung khan $mtd 35 a lalut leh a, a zawnin dinhmun sang ber a luah.

Venom thlipui a tleh
Kumin April thla khan Avengers: Infinity War tlangzarh a ni a, hun rei tak chhung chu Box Office-ah roreltu a ni. June thla tir lamah Jurassic World: Fallen Kingdom tlangzarh a ni ve leh a, Tom Cruise channa Mission: Impossible Fallout chu July thla khan a chhuak ve leh bawk. October kan chuang kai a, English actor lar Tom Hardy leh American actress Michelle Williams te channa Venom a rawn lang ve leh a, he thriller/action film hian khawthlang mipui a nuai leh mek.

Venom hi October 2 khan release a ni a, Box Office-ah sum lalut hnem ber dinhmun a luah nghal chat. Tlangzarh karah hian $tld 80 zet a lalut a, kar liam ta chhung pawh khan $mtd 35 zet a lalut leh a ni. A sum lakluh hi tlahniam mah se Box Office-ah nekchhuak thei an la awm chuang lo a ni.

Lady Gaga a duai lo!
Lemchan khawvelah mi thar a piang a, a hming chu Lady Gaga a ni. American singer Lady Gaga hian film khawvelah pawh a duai bik loh zia tarlangin, a channa 'A Star Is Born' chuan $mtd 28.4 zet a lalut a ni.

American actor Bradly Cooper nena an chan dunna 'A Star Is Born' film hian tlangzarh karah $mtd 44.3 zet a lo lalut tawh a, kar liam ta chhung pawh khan $mtd 28.4 zet a thawk chhuak leh a ni.

He drama/romance film hi October 4 khan Germany-ah release a ni a, tunlai film chhuak thar zinga en hlawh ber te zinga mi a ni.

Top 10 te chu...
Tun ṭum Box Office-ah hian film chhuak thar hmuh tur a awm nual a, sum thawk chhuak hnem zual zinga an lang phak. Chung zingah chuan - First Man, Goosebumps 2: Haunted Halloween leh Bad Times at the El Royale te pawh an tel. First Man hi top 3-ah a invawrh kai nghal a, Goosebumps 2 pawh sum lalut tam palina a ni pha bawk.

Hetih lai hian Australian actor Chris Hemsworth leh American actress Dakota Johnson te channa Bad Times chu sum thawk chhuak hnem pasarihna a ni thung. Top 10-ah hian Smallfoot, Night School, The House with a Clock in Its Walls, The Hate U Give leh The Nun te chu an lang ve leh bawk.

Box Office Top 10
1. Venom - $mtd 35
2. A Star Is Born - $mtd 28.4
3. First Man - $mtd 16
4. Goosebumps 2: Haunted Halloween - $mtd 15.8
5. Smallfoot - $mtd 9.1
6. Night School - $mtd 7.8
7. Bad Times at the El Royale - $mtd 7.1
8. The House with a Clock in Its Walls - $mtd 3.8
9. The Hate U Give - $mtd 1.7
10. The Nun - $mtd 1.3