Praise On 2018 ; Second round ṭan a ni leh ta

Synfo-in KṬP branch hrang hrangte tana live band hmanga inelna a buatsaih, Praise On 2018 chu nizan khan Mission Veng Kohhran Hall-ah chhunzawm a ni leh ta. Second round hi zanin leh nakzanah chhunzawm a ni ang.

Second round-ah hian band 32 an intihsiak dawn a, nizan khan band 13 te an inlan a ni. Zaninah band paruk an inlan dawn a, inkhawm zan a nih avangin intihsiak hi dar 8:45-ah ṭan a ni ang. Ningani zanah band 13 an zai leh ang a, zan dar 7:00-ah ṭan a ni ang.

Second round aṭang hian judge-te'n an duh zawng an sawi (comment) tawh dawn a, intihsiak a hmuhnawm sawt dawn. Endiktute hi Upa Zothanmawia, T.Upa Elijah Lalrinawma leh T.Upa Richard VL Zara te an ni a, Malsawmtluanga Sailo, Drop Doubt chu guest judge a ni ang.

Praise On hi Hruaina Eng channel-ah live-a pek chhuah a ni a, LPS leh ZONET-ah en theih a ni. Second round result hi October 20, Inrinni zan dar 9-ah Hruaina Engah puan a ni ang.