Voltas Malsawm House Ṭhazual Gospel ; One in Christ 'Isua hnenah chauh' pakhatna

Voltas Malsawm House Ṭhazual Gospel chart-ah chuan One in Christ hla 'Isua hnenah chauh' pakhatna a ni a, Stacy VL Muanpuii 'Ka Van in kawng' chu pahnihna a ni a, Felfeli Ralte 'Riangvai mai ka ni' chu pathumna a ni thung.

'Isua hnenah chauh' a mawi ber
He hla hi hla thar a ni lo. K.Zohmingliani'n thiam taka a sak ṭhin kha niin tunhnaiah One in Christ chuan music video awmze nei tak nen an rawn tichhuak a, thla khat chhung vel lekin chart topper an rawn ni der mai.

OiC hian January thla laihawl velah khan he hla hi kumina an hla tihchhuah hmasa ber ni turin an rawn chhawp chhuak a, a hla a lo mawi sa bawk nen, ngaihthlak a hlawh nghal hle. Thla khat chhung vel lekin YouTube lamah pawh thlirtu nuai thum dawn an awm der tawh a ni.

OiC term thar-a an music video hmasa ber hi a hla a mawi bakah music video hmuh a nuam a, pakhatna a ni hi a awm viau. Chart lehah pakhatna a la ni thei dawn em tih erawh hriat a chakawm tawh viau mai.

Pahnihna leh pathumna chu
Stacy VL Muanpuii 'Ka Van in kawng' chu palina aṭangin pahnihnaah a rawn inhlangkai ta. He hla hi a mawi hle a, chart-ah pawh a dinhmun a ṭha chak hle. Pathumna chu Felfeli Ralte 'Riangvai mai ka ni' kha a ni a, he hla pawh hi thla khat vel lekah top 3-ah a rawn inhlangkai der tawh a ni.

Chart-a hla dangte
Lalthansangi 'Pathian angchhung thianghlimah' chu palina a ni a, Rka Boihtlung chuan 'A ko che' hmangin top 5 a khar.

Ṭhazual chart top 10-a lang zingah hian Bethsy Lalrinsangi, Vanlalrohlui (Duati), Immanuel Lalnunsanga, Lalthansangi leh Nghaktea Fanai-te pawh an lang a ni.

Ṭhazual Gospel chart top 10:-
1 One in Christ Isua hnenah chauh
2 Stacy VL Muanpuii Ka Van in kawng
3 Felfeli Ralte Riangvai mai ka ni
4 Lalthansangi Pathian angchhung thianghlimah
5 Rka Boihtlung A ko che
6 Bethsy Lalrinsangi Nang chawimawi nan
7 Vanlalrohlui (Duati) Ka man thisen a ni
8 Immanuel Lalnunsanga Ka zawng zel dawn
9 Lalthansangi A chatuan ro luah tumin
10 Nghaktea Fanai I ropui an hril