Billboard 200 Chart-ah 'A Star Is Born' sound track a hit ber

Lady Gaga leh Bradley Cooper te chuan hlawhtlinna an chang zui zel a, 'A Star Is Born' sound track chu Billboard 200 Chart-ah No.1 a ni.

'A Star Is Born' soundtrack hi October 5 khan tlangzarh a ni a, a hit rem rem hle. Lady Gaga leh Bradley Cooper te album hi hralh a tla hle a, tun hnai kum thum chhunga hralh chhuah hnem ber a ni. 'A Star Is Born' sound track hian a zawnin dinhmun sang ber a luah thei a, tunlai album hralh kal ber a ni mek.

Tlangzarh aṭanga kar khat lek chhungin copy 200,000 zet an hralh chhuak a ni. Kum 2015-a tlangzarh 'Fifty Shades of Grey' sound track kha hralh a tla viau bawk a, mahse 'A Star Is Born' hian a rawn khum ta a ni. The Greatest Showman leh Black Panther: The Album te chu tun hnai sound track hralh kal ber ber zingah an tel bawk.

Gaga a ropui
Music khawvelah American singer Lady Gaga ropui zia sawi nawn a ngai lo a, a hawina lam apiangah hlawhtlinna a chang a ni ber. Gaga hian Billboard 200 chart-ah hian ṭum nga zet No.1 a hauhna a ni ta a, hetiang dinhmuna ding thei hi amah chauh a ni. Born This Way, Artpop, Cheek to Cheek leh Joanne te chu No.1 a lo hauhpui tawh a, 'A Star Is Born' nen a rawn inlar zui leh zat bawk a ni.

Lady Gaga hi Taylor Swift chuan a hnaih ber a, ṭum li No.1 a hauh tawh a ni. Hetih lai hian mipa lamah chuan Drake (8), Justin Bieber (6) te chu a phak lo a, Future, J. Cole leh Kanye West te chuan ṭum nga zet dinhmun sang ber hi an lo luah ve tawh bawk.

Film khawvelah
'Poker Face' singer Lady Gaga hi khawvelin a hmelhriatna chu music-ah a ni. Gaga hian a talent neih ṭhat zia pholangin, a vawi khat nan film puitling-ah a inlan a, a hlawhtling hle.

A channa 'A Star Is Born' chu Box Office-ah sum lalut hnem ber pahnihna a ni mek a, kar hnih chhung chu a zawnin a hauh tawh a ni. American actor Cooper nen an inkawp fuh hle a, an infak tawn nasa hle. Gaga hian film khawvelah pawh a duai bik loh zia a tarlang mek zel a ni.