'Dog' aia bauh ring 'Uncharted'

A chiang e, tun thlasik chu Tom Holland tana vanneihna hun a ni ringawt. Spider-Man dinhmun ropui taka a dinpui hnuah a film channa dang 'Uncharted' chuan ro a rawn rel leh tawh. A sum lakluh zat pawh a theuneu lo hle.

Chart-ah 'Uncharted' a chungnung
'Spider-Man: No Way Home' tlangzarh a nih aṭanga kar 10 vel a ral hnuah Tom Holland-a channa tho action-adventure film 'Uncharted' chu tlangzarh a ni a, sum a lalut tam nghal hle.

Kar tawp liam ta chhung khan North America-a theatre 4,275-ah tihchhuah a ni a, $51,000,000 zet sum a lalut.

Mark Wahlberg, Victor Sullivan, Sophia Ali, Tati Gabrielle, leh Antonio Banderas-te inlanna film, video game behchhana siam film hi 'Zombieland' director Ruben Fleischer direct a ni a, US pawn lamah $88,000,000 lai sum lalut tawh bawkin an budget aia tam sum an lalut tawh a ni. Ram hrang hrang Box Office aṭanga a sum lakluh tawh zat belhkhawm chu $139,000,000 lai a ni tawh a, he film siamna atana an sum sen zat chu $mtd 120 vel a ni thung.

'Uncharted' film chungchangah hian film review-tute ngaihdan a inchen lo viau. Tom Holland erawhin fak a hlawh viau thung a, chutih rual erawh chuan a casting bakah originality a nei tawk lo nia sawite pawh an awm ve nuk tho. Rotten Tomatoes lamah critics 187-in review tawhin rating 5.3/10 a hmu a ni.

'Dog' leh 'Uncharted' a inthlau
Pahnihna 'Dog' leh 'Uncharted' sum lakluh a inthlau viau. 'Dog' hian theatre 3,677 aṭangin $18,011,000 sum a lalut a, US pawn lamah he film hi tlangzarh a la ni lo.

Comedy-drama road film, Channing Tatum-a channa hi amah Channing Tatum leh Reid Carolin-te direct a ni a, Jane Adams, Kevin Nash leh Q'orianka Kilcher-te pawh he film-ah hian an chang a ni. Critics lam mit erawh a tlung a, Rotten Tomatoes-ah chuan rating 6.2/10 a hmu a ni.

'Spider-Man: No Way Home' bawk
'Spider-Man: No Way Home' chu sum lalut tam pathumna a ni a, $8,500,000 lai lalut lehin kar hmasa lama chart topper 'Death on the Nile' aiin sum a lalut tam zawk. 'Death on the Nile' hi palina ani a, 'Jackass Forever' chu pangana a ni ve bawk.

Film thar dang pahnih
Box Office Mojo chart-ah film 23 tarlan a ni a, chung zingah chuan 'Uncharted' leh 'Dog' bakah hian film thar dang pahnih a awm. 10-na 'The Cursed' leh 22-na 'Ted K'-te chu chart-a film thar lang an ni bawk.