N. Zakhai leh a thawhpuite'n Miss Mizoram Zirsangpuii lawmpuina hun hmang

N. Zakhai, CEM, MADC leh a thawhpuite chuan nimin chawhnu dar 2 khan CEM chamber-ah Mara ram aiawhin Zirsangpuii Syuhlo, Miss Mizoram lawmpuina hun an hmang.

K. Chhihrau, Executive Secy, MADC chuan lawmpuina inkhawm hi kaihruaiin, N. Zakhai, CEM, MADC chuan, "Mara nula ngei Miss Mizoram i ni hi Mara ram mipuite'n kan lawmpui chein kan ngaisang takzet che a ni," a ti. Miss Mizoram hnenah pangpar hlanna a nei nghal bawk.

He hunah hian Miss Mizoram Zirsangpuii bakah a pa VL Beiseia-te pawhin thu an sawi a, H. Sahlo, Chairman, MADC chuan Citation hlanna a hlan a ni.