Box Office India Bollywood khawvel awptu Andhadhun

October 5 khan Bollywood khaw­vel nghawrnghing thei tura ngaih film thar a chhuak a, chu chu Andhadhun a ni. Ayushmann Khurrana leh Radhika Apte te channa film hian beisei ang ngei­in Indian Box Office a thunun a, tunlai Bollywood film lar leh ngaihven hlawh ber a ni mek.

Andhadhun hian tlangzarh ni aṭang phatin sum a huilut hnem a, ni 10 a ral meuh chuan vaibelchhe 50 dawn a lalut tawh a ni. A sum lakluh tawh zawng zawng hi vbch 41.05 zet a ni tawh a, tunkar chhungin vbch 50 a lakluh hman a rinawm.

Beisei a sang...
Thriller/mystery film Andha­dhun hi Indian film director lar Sriram Raghavan kutchhuak a ni a, beiseina pawh a sang hle. Rin lawk ang ngeiin India mipuiin an hlut a, hmun hrang hrangah entu an ṭhahnem thei hle.

Andhadhun hi khawpui hrang hrangah chhuah chhoh mek zel a ni a, a sum lakluh pawh hi a la pung chho zel dawn niin a lang. Bollywood super star te inlan lo mah se he film hian boruak a nei lian a, film chhuak thar awm tam loh lai a nih bawk avangin a thawm hi a lian zual hle a ni.

Hetih rual hian elpui tur - Loveyatri, Helicopter Eela leh FryDay te an awm a, kal fawr lutuk thei a ni bik lo. October 5-a tlangzarh Loveyatri hian thawm a nei lian a, Govinda channa comedy film FryDay thawm a ring viau bawk. Helicopter Eela lah kar hmasa maia tlangzarh a nih avangin dahbo a thiang lo bawk.

Ayushmann hi actor Ayush­mann Khurrana leh director Sriram Raghavan te thawhdunna hmasa ber film a ni a, a hlawhtling nghal hle a ni.