Essy hla thar 'Hringnun'

'Hey' tih leh 'Inchhuang mai lo la' tih hla hmanga Zoram mipui min lo awi tawh ṭhintu Esther Lalpekhlui chuan hla thar 'Hringnun' tih chu a peihfel leh ta.

Essy hla thar hi Myztic Sailo phuah a ni a, MDM Library-ah dahluh niin, Zonet local channel leh YouTube lamah te en tur a awm thuai dawn a ni. Music track hi Nunzemawia siam sak niin, recording hi Foster Records kutchhuak a ni. Music video siam lama hnuhma nei ṭha ber pawl Mawitea Hauchhum (RDS Shots) chuan video hi a siam sak thung a ni.

'Hringnun' tih hla hi lengzem leh lenglawng huanga rinluh theih ve ve a ni a, a hla thu pawh a ṭha viau bawk. He hla-ah hian Grace 10.45 chuan a pui bawk a, ngaithlak chakawm tawh tak a ni.

Mizo Idol aṭanga mipuiin an hmelhriat Essy hi a reh deuh vang vang hnuah hla thar nen a lo kir a, kumina a music video hmasa ber a ni nghal bawk. Music video pali a siam tawh zingah - 'Hey' tih leh 'Inchhuang mai lo la' tih te chu thlan hlawh ber ber an lo ni tawh a ni.