Ṭhazual Fakna: Crosscraft ft Fiona Pachuau 'Fak hla rimawi' aia ri mawi a la awm lo
Ṭhazual Fakna chart-ah chart hmasaa pakhatna Crosscraft ft Fiona Pachuau 'Fak hla rimawi' bawk pakhatna a ni leh a, Grace Lalchhanhimi 'Ka chanchin' chu pahnihna ni thungin Amtea 'Engpawh thleng se' chu pathumna a ni bawk.
'Fak hla rimawi' bawk a la mawi ber
Crosscraft ft Fiona Pachuau 'Fak hla rimawi' bawkin chart-ah ro a rel leh a, zaithiam ṭha rual awmkhawmna chart-ah a zawna pakhatna an ni thei hi a hlu hle.
Hla thu ṭha, mawi leh ngaihthlak nuam tak Zofate min ngaihthlak tirtu Crosscraft leh Fiona Pachuau-te hian pakhatna nih chhunzawm hi an phu hle. An rimawi ngaihthlak a nuamin a 'class' piah lamah Fiona-i a zaithiam bawk a, a zawna pakhatna an ni thei pawh hi a mak lo a ni.
Ṭhazual chart-ah an lan aṭangin hma an sawn chho zela tunah chuan a zawnin chart no.1 an ni ta hial. Chart lehah eng dinhmunah nge an din dawn hriat a chakawm tawn hle. Ṭhazual award sem turah pawh Best Songwriter Gospel category-ah nomination he hla hian a hmu bawk. Ṭhazual award hi kar hmasa lama sem tura tih kha ni mah se kan boruak tawnin a zir loh avangin sawn a ngai ta a, a hun tur erawh tihchian a la ni chiah lo.
Mizo Idol Grace-i pahnihna
Mizo Idol hmeichhe hmasa ber Grace Lalchhanhimi 'Ka chanchin' chu pahnihna a ni a, chart hmasaah khan pathumna niin tunah chuan a dinhmun a ṭha leh hret a; kar leh lamah dinhmun ṭha berah a ding thei dawn em tih hriat a chakawm tawh hle.
Pathumna pawh chart hmasaa palina Amtea 'Engpawh thleng se' kha a ni a, ani pawh hian hma a sawn ve zel a ni.
Chart-a inlan an ṭha zel
Ṭhazual Fakna chart top 10-a langte hi an ṭha ṭhin hle a, tun ṭumah pawh an ṭha leh hawm hle.
Stacy Punte 'Min thlahthlam ngai lo' chu palina a ni a, Cindy Lalthanpuii 'Hlau suh' chu pangana a ni bawk. Anni bakah hian Zorinsanga Sailo, Sawmtea, Baby Malsawmtluangi, Mapeka leh Sailo Lalsangzualite pawh chart top 10-ah hian an lang a ni.