Wonder Woman 1984: Theatre-a tihchhuah a nih hnu karah HBO Max-ah?

Wonder Woman 1984 chu theatre-a tlangzarh a nih hnu karah HBO Max-ah en theihin a awm nghal mai thei niin khawthlang lam media ṭhenkhat chuan an report a, mahse hei hi thuchiang a la ni lo.

Tun dinhmunah Warner Bros. lam hian thuchiang an la puan loh avangin Wonder Woman 1984 pawh hi Krismas ni taka tlangzarh tur angin ruahmanna a la kal a ni. Tunah hian US-a theatre-te hawn ṭan ni tawh chu an khar lehnual tawh zawk a, hripui lengin ziaawm lam a pan hleihtheih loh avang leh a thawh hnihna a thawk leh ṭan mek nia a lan avangin Western Europe-a ram tam ber pawhin theatre an khar leh mek a ni. Hetiang a nih tehnuaih avang hian Christopher Nolan-a big budget movie Tenet anga risk lak ve  Wonder Woman 1984 siamtu lam hian an ngam chiah lo niin an tarlang.

Warner Bros. hian duhthlan tur pahnih an nei nia tarlan niin, an duhthlan theih pakhat chu nakkum June emaw July emawa Wonder Woman 1984 tlangzarh hun sawn hlat hi a ni a, hei hi an thlang a nih erawh chuan an studio-in film an tlangzarh tur dang a nghawng mai thei. A nih loh chuan ruahmanna an siam tawh sa angin Krismas ni taka tlangzarh a, a hnu kara streaming service HBO Max-a tlangzarh leh mai pawh an thlang zawk thei a, mahse hemi chungchangah hian studio boss lamin engmah an la sawi chiang lo thung.