Gaming News: PS4 game hralh chak ber Ghost of Tsushima

Ghost of Tsushima chu Playstation original game hralh chak ber niin record thar a siam.

Game developer lar tak Sucker Punch-in an siam open world samurai game Ghost of Tsushima hi hralh a kal hle a, July thlaa PlayStation 4-a khelh theih tura tlangzarh a nih aṭang khan copy maktaduai nga chuang an hralh der tawh tih PlayStation Worldwide Studios head Hermen Hulst chuan a sawi a, PS4 game lar Horizon Zero Dawn record lo siam tawh chu a khum a ni.

Ghost of Tsushima-in record thar a siam thu hi kar hmasa Ningani zanah khan Hulst hian a tweet a, game developer Sucker Punch lam pawhin an game kheltute chungah lawmthu sawiin Hulst tweet siam hi an retweet ve bawk.

Hemi chungchangah hian 'Original' tih thumal hi a pawimawh hle. Marvel Spider Man khan ni thum chhung lekin copy maktaduai 3.3 an hralh hman a, mahse playstation original a ni lo a, a IP neitu Marvel an nih avangin record-ah playstation lam hian an pawl lo. Chutiang bawk chuan Ghost of Tsushima tlangzarh hma lawk thlaa an tlangzarh  The Last of Us Part II pawh kha tlangzarh a nih aṭanga ni thum chhung lekin copy maktduai 4 chuang an hralh hman a, mahse hei pawh hi playstation original a ni lo.

Ghost of Tsushima hnaih bertu chu Horizon Zero Dawn a ni ta a, tlangzarh a nih aṭanga ni hnih chhung lekin copy maktaduai 2.6 an hralh hman a, mahse thla li chhungin copy mtd 3.4 vel an hralh thung. 

Ghost of Tsushima hi action-adventure game a ni a, game review-tu ṭhenkhat chuan a open world activity avangin sawisel deuh mah se visual leh combat lamah erawh fak a hlawh hle a ni. Tlangzarh a nih karah khan UK-ah chuan tlangzarh kara  physical game hralh kal ber a ni nghal a, Japan-ah pawh chutiang tho chu niin USA leh Europe game download chart-ah pakhatna a ni bawk. Ni thum chhung lekin khawvel pumah copy mtd 2.4 chuang an hralh hman a ni.