Michael Buble A Ṭawng chhuak

Khawthlang media te chuan Canadian singer Michael Buble-a'n rimawi khawvel a chhuahsan dawn niin an sawi a, mahse thu belhchian dawl lo a lo ni! Kum 43 mi Michael Buble chu hemi chungchangah hian a ṭawngchuak ve ta a, zai chawlhsan tumna aneih loh thu a sawi.

Canadian singer hian a fapa cancer avangin music a chawlhsan dawn niin media te chuan an tarlang a, mipui a barakhaih hle. 'Haven't Met You Yet' hitmaker hian chhungkaw tan hun tam zawk hman a duh a, a fapa kum nga mi Noah kianga awm a thlahlen niin an sawi. Noah hi a cancer tih hriatchhuah a ni a, hei hian a nun nasa takin a nghawng a ni, an ti.

Mahse heng zawng zawng hi kum 43 mi Michael Buble tan rimawi khawvel chawlhsanna tham a tling lo a, zai zel a la duh a ni. Hei hi a zai ngainatute tan chuan chanchin lawmawm tak a ni ngei bawk ang.

Buble chuan hemi chungchang hi tun hnai khan The Associated Press a hrilh a, a chungchanga thuleng vak chu a rawn titawp ta a ni.