Aizawl-ah 'Thingtlang Tlangval'! October 27-ah Hawla Auditorium-ah chhuah a ni dawn

Hmeithai fa, thingtlang aṭanga Aizawla college kal, a nuna har­satna leh buaina tam tak tawk chan­chin tarlanna 'Thingtlang tlang­val' film chu October 27 hian Hawla Auditorium-ah chhuah a ni dawn.

Israel Lalbiakrema, H. Vanlal­hlim­pui leh Bethsy Lalrinsangi te channa, 'Thingtlang Tlangval' hi October 25 hian Lunglei-ah tlangzarh a ni dawn a, Aizawl leh khaw hrang hrangah te chhuah zui a ni dawn bawk.

Hmasawnna duhawm

Mizote hi film industry-ah kan hniam tih chu hai rual a ni lo a, ṭhenawm state te pawh kan el pha lo hle. Tun hnaiah erawh hma­sawnna a zuanin a zuang a, Mizo film en man hla tak tak hmuh tur a awm ta zut mai.

Film siamtu te pawhin nasa tak­in ṭan an la a, sorkar pawhin a phurpui hle niin a lang. Hetiang karah hian training leh competition te buatsaih ve reng a ni a, chu chuan hmasawnna a thlen mek zel a ni.

Film siam lama sulsutute zinga mi Mapuia Chawngthu (Leitlang Pictures) kutchhuak en tawh ten ennawn an chak a, a film siam te pawh a hit viau zel bawk.

Tun ṭuma film chhuak thar tur 'Thingtlang Tlangval' pawh hi Malsawma (M_Space) leh Mapuia Chawngthu te kutchhuak a ni a, tlangzarh a nih hma hauh aṭangin mipuiin an ngaihven. Social media lamah pawh hmuh tur a tam a, Mizo film ngainatuten hun rei lo teah an nghak chhuak dawn ta a ni.

Zaithiam rual te nen

Khawvel huap pawha zaithiam lar zingah Hollywood leh Bollywood thlenga hnuhma nei ṭha tak tak an awm a, kan Mizo zaithiam te zingah pawh acting lama inhmang tak tak an awm ta nual mai.

Musical film chhuak thar tur 'Thingtlang Tlangval'-ah pawh hian zaithiam lar tak tak hmuh tur an awm nual dawn. Israel Lalbiakrema, Bethsy Lalrinsangi leh H. Vanlalhlimpuii te kan hmu dawn a, actiang lamah engtiang chiah nge an nih a hriat thuai dawn a ni.

Hlimhlimi leh Israela te hian OST an sa nghal dawn bawk a, Sangtei Khawlhring a la awm cheu bawk. OST hi Hlimhlimi sak 'Ṭhian rinawm' tih leh, Israel Lalbiakrema leh Sangtei Khawlhring ten an sak 'A kim ngei ang' tih te a ni.

He film-ah hian lemchan khawvela hnuhman nei ṭha tak - Rosangpuii (Damna Kim), Papuia Pachuau (Scooty), Mimi K.Lalnunfeli (Anabaino) te hmel hmuh tur a awm dawn bawk a ni.