The Suicide Squad-ah Sylvester Stallone a chang ve!

The Suicide Squad writer-director James Gunn chuan veteran actor Sylvester Stallone chu The Suicide Squad-ah a chang ve tih a sawi mauh mai.

James Gunn leh Silvester Stallone-te hi Guardians of the Galaxy Vol. 2-ah pawh khan an lo thawk dun tawh a, The Suicide Squad-ah pawh hian an thawk dun leh ngei a nih hmel. Instagram lamah Gunn hian an pahnih thlalak tarlangin a caption-ah, 'Ka ṭhianpa (Silvester) nena thawhdun hi a nuam ka ti reng a, vawiina The Suicide Squad-a kan thawhdun pawh hi sawi hmaih chi a ni lo. Movie star lar tak a nih piah lamah hian mi tam tak chuan eng anga lemchan thiam nge hepa hi a nih an la ngaihtuah thiam lo,' tiin a ziak.

Hemi hnu lawk hian Stallone pawh hian Gunn bula hna thawk theia a awm chu vannei a intih thu a sawi ve leh bawk.

Stallone hian eng role nge a play dawn chiah tarlan la ni lo mah se mi tam chuan an inrinsiak mek a, a hmel lang loin  King Shark aw atan a aw an hmang mai thei nia sawi thawmte pawh awm nghal mah se engmah thuchiang a la awm lo a ni.

The Suicide Squad-ah hian milar an inlan hnem dawn hle a, Margot Robbie, Idris Elba, John Cena, Joel Kinnaman, Peter Capaldi, Viola Davis, Jai Courtney, Alice Braga, Pete Davidson leh David Dastmalchian-te pawh an inlan dawn a ni. Chumai a la ni lo, Sean Ginn leh Flula Borg-te pawh an chang dawn bawk.