Praise On 2018 ; Top 10 lut a hriat ta

Praise On 2018 chu neih chhoh mek zel a ni a, top 10 lut te pawh a hriat ta. Inrinni zan khan Hruaina Eng channel-ah result hi tarlan a ni a, Aizawl khaw pawn aṭanga tel te an inhamtang zo ta lo a ni.

Aizawl veng hlun tak tak - Chaltlang, Chanmari West, Dawrpui, Dawrpui Vengthar, Electric Vengthlang, Khatla, Leitan, Ramhlun leh Republic Veng te chu top 10-ah hian an inhlangkai a ni.

Synfo-in Kristian Ṭhalai Pawl (KṬP) branch hrang hrangte tana live band hmanga intihsiakna a buatsaih, Praise On 2018 hi Mission Veng Kohhran Hall-ah neih a ni a, a hmawr bawk a hnai tawh hle. Second round-ah band 32 an inlan a, chung zing aṭang chuan a ṭha zual 10 an la dam a ni. Top 10 te hi November 6

aṭangin an intihsiak leh dawn a, final round a ni tawh dawn a ni.

Praise On 2018 hi September 18 khan Mission Veng Kohhran Hall-ah ?an a ni a, band 50 chuang an tel a ni. ZONET Zing Daifim puangtu leh Hruaina Eng channel-a presenter ni bawk K. Lalrampani (Mapuii), Chanmari chuan a host a, Judge te hi Upa Zothanmawia, Khatla, T.Upa Richard V.L. Zara, Chawnpui leh T.Upa Elijah Lalrinawma, Kulikawn-te an ni a, guest judge an awm ṭhin bawk.

Mizoram Synod hnuaia Information & Publicity (Synfo) buatsaih Praise On hi kum 2016 khan buatsaih ?an a ni a; kum 2016-ah malzaia intihsiak niin, nikum khan group zaia inelna neih a ni.

Kuminah chuan band (beat group) hmanga intihsiakna neih a ni ve thung a, Hruaina Eng channel-ah live-a pek chhuah ṭhin a ni a, LPS leh ZONET-ah te live-a pekchhuah a ni bawk.

Praise On 2018 Top Ten
1. Chaltlang - Band 1
2. Chaltlang South
3. Chanmari West Hmarveng
4. Dawrpui
5. Dawrpui Vengthar - Band 2
6. Electric Vengthlang
7. Khatla East
8. Leitan South
9. Ramhlun North - White
10. Republic Veng