CWC-te'n Brahmaputra leh Siang lui an thlithlai

Tibet ram chhunga leimin nasa tak chuan Brahmaputra leh Siang lui hnar lamah harsatna a thlen mek a, hemi enfiah tur hian Central Water Commission (CWC) official te chuan a hmun an thleng tawh.

Lei min hian China ram chhunga Yarlung Zangbo lui luan dan nasa takin a tidanglam a, hei hian Assam leh Arunachal Pradesh mipuite tan harsatna thlen thei dinhmunah a ding mek a ni. Yarlung Zangbo hi Brahmaputra leh Siang lui hnar lam a ni a, a bul hnai cheng te leh, dil ṭhenkhat te chu chim mai thei dinhmunah a ding mek a ni.

Hemi chungchangah hian China sorkar chuan India chu hma la turin a lo ngen tawh a, leimin hian Yarlung Zangbo lui luan dan nasa takin a tibuai niin a sawi. Hemi bawhzui hian sorkarlai pui chuan Central Water Commission (CWC) official te chu Brahmaputra leh Siang lui te a hmunah kal chilha hma la turin a tir chhuak a ni.

Lei min hian lui kuang a thlak dang lam bakah, tui chim chin pawh nasa takin a tisang a, hei hian harsatna nasa zawk a thlen a hlauhawm hle niin an tarlang. Lui kuang lian hian Assam leh Arunachal Pradesh tan harsatna a thlen theih avangin chak taka hma lak a ni a, AP-a Tuting-ah chuan tui chim chin hi a sang chho hle tawh nia tarlan a ni.

CWC official te chuan hei hi Assam-a Dibrugarh district tan pawh a hlauhawm pha thei tih sawiin, mipui te chu fimkhur turin an chah a ni. Hetih rual hian Brahmaputra lui luan dan erawh a danglam nasa lo nia tarlan a ni. Inland Water Transport (IWT) Department pawhin Dibrugarh district-ah hian lawngleng service tihtawp lailawk a nih thu an sawi bawk.

Assam Chief Minister Sarbananda Sonowal chuan NDRF official te chuan an state an lo thleng tawh tih Inrinni khan a puang a, district hrang hrang an tlawh kual nghal tih a sawi. Hetih rual hian Dhemaji, Dibrugarh, Lakhimpur leh Tinsukia district thuneitute pawh biak pawh an nih tawh thu a sawi bawk.

Assam CM chuan tuilian a thlen thulha mipui te chu lo inbuatsaih lawk tura hriattir an nih thu leh chiaina tur a awm loh thu hriattir an nih thu a sawi. Hemi chungchangah hian External Affairs Minister Sushma Swaraj pawh a be pawp tawh tih sawiin, chak taka hma lak mek a ni, a ti bawk.

Arunachal Pradesh-ah hian National Disaster Rescue Force (NDRF) company pariat tirhluh an ni tawh a, Assam-ah pawh company paruk tirhluh an ni tawh bawk.