Amtea chhingzo an awm lo

'Engkim ka hlan e' tih hla thiam taka satu Amtea chuan Hontrade International Ṭhazual Fakna chart-ah No.1 a hauh leh ta. Amtea hian a zawna dinhmun sang ber a luahna chiah a ni a, gospel singer zingah amah chhing zo an la awm lo.

Amtea hi tunlai gospel singer zingah chuan hriat hlawh ber te zinga mi a ni a, hla lehlin lamah pawh talent anei ṭha viau bawk. Tun hnaia a music video tihchhuah te chu a lar viau zel a, August thla maia a tihchhuah 'Engkim ka hlan e' tih pawh hi tun lai fakna hla thlan hlawh ber a ni mek.

Kumina a musc video pahnih­na 'Engkim ka hlan e' tih hi Rev. C. Lalrinliana lehlin niin, hla thu ṭha tak a ni. Video hi MDM chuan September thla khan an YouTube channel-ah an upload-a en a hlawh hle a ni.

Grace-i a inlar
Mizo Idol 2014 Grace Lal­chhanhimi chu Hontrade Inter­national Ṭhazual Fakna chart-ah a inlar a, dinhmun sang ber dawttu a luah. Grace-i hian tun hnai khan music video 'Rinin ka thlir ṭhin' a tichhuak a, he hla hmang hian sang taka a rawn invawrh nghal a ni.

Kolasib nula Grace-i hian kumina a music video hmasa ber 'Rinna mitin ka thlir ṭhin' tih hi September thla khan a tichhuak a, Mizo Idol 2018 Grand finale-ah a sa bawk. Mizo mipuiin a zai an ngaina tak zet tih a lang a, chart-ah pawh dinhmun sang ber luah turin a dinhmun a ṭha hle.

A hla thar hi Blue Wave Record ten music leh recording an tihsak a, video hi Siama (SVP) kutchhuak a ni thung. Grace-i hian project buaipui mek a nei bawk a, kumin chhunga tihchhuah hman beisei a ni.

Stacy V.L. Muanpuii chuan 'Kan hneh zel dawn' tih hla hmangin pathumna a hauh a, PC Vanlalhriati chuan a dawt. Armed Veng South nula Hlimhlimi chu top 5-ah a inhlangkai a, Jennie Lalruatfeli chu parukna a ni. Top 10-ah hian Felfeli Ralte, C. Vanlalduati leh Euphony te an lang a, tun hnaia hla thar tichhuak Henry Varte chu a sang zual zingah hian a lang nghal bawk.