Billboard ; ‘Encanto’ Soundtrack a duhawm ber zel

Billboard 200 chart leh Hot 100 chart-ah chuan ‘Encanto’ Soundtrack bawkin ro a la rel chhunzawm a, Billboard 200 chart-ah phei chuan kar ruk lai chart topper a ni tawh.

Tunhnaiah kar ruk chart topper ni thei an tam lo
‘Encanto’ Soundtrack hi Billboard 200 chart chung berah kar ruk (a zawn ni loin) a cham ta a, Adele '30' nen an cham rei chhung a inang ta chiah. Morgan Wallen 'Dangerous: The Double Album' leh Taylor Swift 'Folklore' chiah tunhnai kum nga chhungin chart topper nih rei zawngah an pha tawh lo. January 2017 hnu lamah Morgan Wallen 'Dangerous: The Double Album' chu Billboard 200 chart-ah topper a ni ngun ber a, vawi 10 lai niin Taylor Swift 'Folklore' chu vawi riat a ni ve tawh bawk.

'Encanto' soundtrack hian 98,000 equivalent album unit kar hmasa chhung khan a hmu chhuak a, on-demand official stream-ah he album hi vawi maktaduai 123.44 vel US-ah stream a ni angin MRC Data chuan a chhut a ni.

Gunna 'DS4Ever' chu pahnihna ni thungin Wallen-a album 'Dangerous: The Double Album' chu palina aṭangin pathumnaah a rawn inhlangkai ve leh bawk.

Super Bowl Half Time show hlawkpuiin Eminem leh Dr. Dre an lo kir
Super Bowl Half Time show hlawkpuiin Eminem leh Dr. Dre-te chu Billboard 200 chart top 10-ah an lo kir a, Eminem album chart topper-te pawh lo ni tawh 'Curtain Call: The Hits' chu 126-na aṭangin pariatnaah a rawn invawrh a, Dr. Dre 'Dr. Dre' album pawh 108-na aṭangin pakuanaah a rawn inhlangkai ve bawk.

The Hot 100-ah 'We Don't Talk About Bruno' bawk
‘Encanto’ Soundtrack zinga hla hit ber mai Carolina Gaitan, Mauro Castillo, Adassa, Rhenzy Feliz, Diane Guerrero, Stephanie Beatriz & Encanto Cast 'We Don't Talk About Bruno' chu kar lina atan Billboard Hot 100 chart-ah pakhatna a ni leh.

Disney hit animated film 'Encanto'-a an hla hi Disney movie-a an hla sak zinga Hot 100 chart-a pakhatna ni ngun ber a ni ta a Bryan Adams, Rod Stewart leh Sting-te hla sak, 'The Three Musketeers', 1994-a tihchhuaha mi 'All for Love' kha kar thum a chamin record chelh mektu a ni a, 'We Don't Talk About Bruno' hian a rawn khum ta a ni.

Glass Animals 'Heat Waves' chu pahnihna a ni thung a, 'Adele Easy on Me' chu pathumna a ni ve leh bawk. GAYLE 'abcdefu' chu top 5-ah rawn inhlangkaiin palina a rawn ni ve ta a, The Kid LAROI & Justin Bieber chuan 'Stay' hmangin top 5 an khar.

Chart dang
'We Don't Talk About Bruno' hi Global 200 chart-ah pawh topper a ni a, GAYLE 'abcdefu' chu pahnihna a ni. Billboard Global Excl. US chart-ah erawh GAYLE 'abcdefu' bawkin ro a la rel a, Glass Animals 'Heat Wave' chu pahnihna a ni ve thung.

Billboard 200 chart top 10:-
1 Encanto Soundtrack
2 DS4Ever Gunna
3 Dangerous: The Double Album Morgan Wallen
4 Certified Lover Boy Drake
5 The Highlights The Weeknd
6 Planet Her Doja Cat
7 30 Adele
8 Curtain Call: The Hits Eminem
9 Dr Dre Dr Dre
10 SOUR Olivia Rodrigo

The Hot 100 top 5:-
1 We Don't Talk About Bruno Carolina Gaitan, Mauro Castillo, Adassa,
Rhenzy Feliz, Diane Guerrero,
Stephanie Beatriz & Encanto Cast
2 Heat Waves Glass Animal
3 Easy on Me Adele
4 abcdefu GAYLE
5 Stay The Kid LAROI & Justin Bieber