'The Blacklist' Season 10 a chiang ta

'The Blacklist' fan-te tan thu lawmawm hriat tur a awm e.

American crime thriller television series 'The Blacklist' chu NBC chuan season 10 siam a ni leh dawn tih an tichiang tawh. Hemi chungchang hi he series star James Spader chuan 'The Tonight Show Starring Jimmy Fallon'-a a inlannaah a sawi chhuak a ni.

James Spader hi Olympic athlete Nathan Chen, standup comedian Eric Neumann leh Dr. Bernice A. King-te nen 'The Tonight Show Starring Jimmy Fallon'-ah hian an inlan a, chutah chuan NBC chuan 'The Blacklist' siam chhunzawm turin thutlukna an siam ta tih hi a sawilang a, 'The Blacklist' fan-te tan chuan thu hriat nuam tak a ni ngei ang.

'The Blacklist' hi tunah hian season 9 an tichhuak mek a, nikum October thla aṭang khan NBC chuan season 9 hi tichhuak ṭanin tunkarah hian episode 8 a chhuak ang. Variety chuan he series hi mi maktaduai 22 velin an en niin a tarlang.

James Spader hi kum 2013-a tihchhuah a nih aṭang khan he series-ah hian a la inlan char char a, tunah hian episode 183 an siam tawh a ni.