'Oppenheimer'-a inlan tur zingah Sir Kenneth Branagh

Christopher Nolan-a film thar tur ngaihven hlawh tak 'Oppenheimer'-ah Sir Kenneth Branagh chu a chang ve dawn.

Kum 61 mi lemchan thiam leh director ni bawk hi Christopher Nolan nen hian 'Dunkirk' leh 'Tenet'-ahte khan an lo thawk dun tawh a, tunah hian 'Oppenheimer'-ah hian an thawk dun leh dawn ta a ni.

Kenneth Branagh hian role pawimawh lutuk erawh a chang dawn lo niin tarlan a ni. He film-ah hian film star lar tak tak an inlan dawn a, Peaky Blinders star Cillian Murphy chu J. Robert Oppenheimer lema chang tur niin Matt Damon, Robert Downey Jr. leh Florence Pugh-te pawh an inlan dawn a, nakkum July thlaa tlangzarh hman an tum.

Universal Pictures leh Syncopy chuan Thawhlehni liam ta mai khan principal photography chu an ṭan tawh tih an tarlang a, Cillian Murphy, Father of Atomic Bomb anga a hmelhmang hmasa ber pawh pho chhuah a ni tawh nghe nghe.