Kum thum hnuah music video thar nen Hmingtea Chhangte

Hmingtea Chhangte chuan kum thum hnua a muisc video hmasa ber tur a peih fel ta a, a hla hming chu 'Zoram' tih a ni. He video hi Music Domain Mizoram (MDM) library-ah dahluh a ni tawh a, hmuh tur a awm thuai dawn e.

Hmingte hla thar hi tunlai inthlan boruak nen pawha inmil tur tak a ni a, ngaithlak a chakawm tawh hle. A music video-ah pawh tun hnai thil thleng bakah, hun kal tawha thil thleng te tarlan a ni bawk. '

Mahni irawm chhuak ngei!

Zaithiam zingah mahni hla phuah sa ṭhin mi tlem te an awm a, chung zingah chuan Hmingtea pawh hi a tel. Tun ṭuma a music video thar pawh hi ama irawm chhuak a ni a, midang hla phuah a sa ta meuh lo.

Hmingtea chuan, "Kum ruk kalta vel aṭang khan keima hla vek ka la sa a, originality neih ṭhat ka duh vang a ni. Music video te ka direct a, a theih chin chinah mahnia tih ve hi ka tum ṭhin a ni," tiin a sawi. Lam lam pawh a ti thei viau bawk a, midang pawh a zirtir ṭhin a ni.

A kalphung

Hmingtea music video thar hi tunlai boruak nena mil thei tur ang bera duan, inthlan boruak nen pawh a inhmeh viau tur a ni a, Hmingtea chuan, "He hla ka phuah chhan ber chu inthlan te pawh a lo hnai a, mi pakhat talin hlawkna an lo neiha Pathian rawn chunga vote an thlak ngei theih ka beisei a ni," tiin, a hla phuah chhan a sawi.

Video chungchang sawiin, "Hmanlai sap upa te hun lai aṭanga Mizorama thil thleng lar tak tak raw footage lakkhawm a ni hlawm a, mi tam takin kan la hmuh ngai loh te pawh hmuh tur a awm dawn a ni," a ti bawk.

A hla thuah hian pawl hrang hrangin min ṭhen hran dan te, Kohhran leh inlakbingna avanga lungrual taka kan kaltlan theih loh chhan leh, inpumkhatna a tichhiat dan te pawh tarlan a ni bawk. Hmingtea chuan, "Kan chhuahna pawh hmun khat a ni a, kan tum poh hmun khat Vanram kai tum vek kan ni," tiin, inpumkhatna a ngaipawimawh thu a sawi bawk.

Hmachhawp

Kum naupang te ni chunga Zoram dung leh vang deng chhuak thei Hmingtea hian music lama hmachawp a nei nual a, chumi tipuitling tur chuan a bei mek bawk. A hmasa berah chuan a music video a rawn chhawp chhuak a, a dang pawh siam zel a la tum.

Hmun hrang hrangah zaia sawmtu a nei ve reng a, chumi karah chuan hla a phuah bawk. Lam lamah a tui em em bawk a, midang zirtir lamah pawh a tui hle. Hmingtea chuan, "Ka zai reng reng hian mipui lamin tih tur an nei ve ṭhin a, chu chu lam a ni," tiin, lam chu a nuna thil bet tlat pakhat a nih thu a sawi bawk.

Hmingtea hian Mizoram University aṭangin Master of Journalism and Mass Communication a zir zo tawh a, rimawi khawvelah pawh a hun tam zawk a hmang chho thei tura ngaih a ni.