Beckham-a'n a fate entawn nih a beisei

British icon David Beckham chuan hlawhtling tura a thawh­rimna chu a faten an hriat sak a, an entawn a beisei thu a sawi chhuak.

Kum 43 mi Beckham hi tun hnai khan Australian TV show 'The Sunday Project'-ah a inlan a, hemi chungchang hi a sawi chhuak a ni. A hun laia footballer lar ber pawl Beckham chuan an fate - Brooklyn (19), Romeo (16), Cruz (13) leh kum sarih mi Harper te chuan hlawhtling tura a thawmrimna te chu an hriatreng a duh thu leh, entawn se a duh thu a sawi uar hle. A nupui Victoria pawh a eizawnna kawnga a thawhrim thu a sawi lang bawk.

Beckham chuan, "Victoria nen hian kan thawkrim hle a, hlawhtling tura tum ruh leh thawhrim a ngaih zia pawh kan hre chiang hle a ni. Kan fate pawhin hei hi hria se kan duh a, chu mi tur pawh chuan kan zirtir ṭhin a ni," tiin, an fate an enkawl dan a sawichhuak. Hetih rual hian football chuan a nunah hmun pawimawh tak a la chan reng thu a sawi a, kum khat vel chu ṭha taka khelh theih a la inbeisei a ni!