Ukrainian leh Russian Artist-te'n Russia an dem

Ukrainian label Masterskaya chuan Russian artist-te a thawhpuina a titawp. Russian rapper Oxxxymiron chuan indo a duh lohna lantirna atan a headlining tour a ṭhulh

Russia-in Ukraine a rûn vangin Ukrainian music artist-te chuan Russia an demna thu an auchhuahpui a, Russian artist-te pawhin ngawih mai mai an tum bik loa, an ram thuneitute huaisen takin an dem ve bawk.

Ukrainian DJ and singer-songwriter Ivan Dorn, Russia lamah pawh lawm hlawh tak chuan a Instagram account kaltangin Russia rama a fan-te chu vanduaina rapthlak tak thleng mek titawp turin a ngen. "Ka Russian ṭhiante pawh ka ngen a che u. Khawngaihin in vela mite hnenah midang kan mamawh lo tih hi lo hrilh mawlh teh u. Ukraine hi ram zalen, mahnia ro inrel a nih thu hi lo sawi hram teh u. He chhiatna thleng hi i titawp tlang ang u. Ngawi reng bik lo ang u. Ka hmangaih Ukraine, i bulah ka ding e," tiin IG lamah a post.

Dorn-a label din Masterskaya pawhin Instagram kaltlanga thuchhuah siamin Russian artist-te a thawhpuina chu a titawp tih an puangzar ve nghal bawk.

Ukrainian pop singer Svetlana Loboda, Eurovision contestant hlui pawhin IG lamah a rilru nat thu leh zing dar 5 aṭang tawh a chhungte a biak pawh reng thu a sawi.

Veteran Ukrainian singer Sofia Rotaru, album 40 lai tlangzarh tawh leh hla 400 chuang ṭawng hrang hranga record tawhtu pawhin a IG story lamah Soviet hunlaia indo duh lohna hla 'Stork on the Roof' a sa lai a pholang ve bawk.

Russian artist lam
Russian rapper- Kasta, Shym, Vladi, Khamil leh Zmey-te chuan Vladi IG account lamah thuchhuah inṭawm siamin Russia-in Ukraine a bei chu pawi an tih thu leh sipai hmalakna chu an thlawp loh thu an sawi. Sipaite chet dan chu indona dik tak a nih thu an sawi. "Russian thuneitute thuchhuah siamah chuan, Russian mi nawlpuiin an hmalakna chu an thlawp niin an sawi a, mahse chu chu thu dik lo a ni. Kan ṭhenrual hnaiah indo thlawp tumah an awm lo a ni," tiin #notowar an hmang bawk.

Russian rapper tho Oxxxymiron pawhin kum nga chhunga a vawi khatna atana headlining tour a neih tur, ticket pawh a hralh zawh vek tawh chu Russia-in Ukraine a do dodalna lantirna turin a ṭhulh tih a sawi. Karleh lamah hian St. Petersburg-a inlan tur a ni a, March 11-13 inkarah Moscow-a Adrenaline Stadium-a show nei tur a ni bawk. Mahse chung zawng zawng chu a ṭhulh vek a ni.

Eurovision Song Contest-ah Russia tel phal dawn!
Russia ram chu Ukraine laka a chet dan avangin mi tam takin dem mah se Eurovision Song Contest buatsaihtute chuan Ningani khan thuchhuah siamin Russia ram chu kuminah an tel an phalsak dawn tho tih an tarlang.

Show buatsaihtute chuan, "Eurovision Song Contest hi non-political cultural event a ni," tia sawiin Russia tel chu an phalsak dawn tho a, mahse Ukraine-a thil thleng mek chu uluk takin an thlir reng dawn tih an sawi bawk.