WWE super star Roman Reigns a cancer

World Wrestling Entertainment (WWE) super star Roman Reigns chuan cancer a vei thu a puang a, ring chhungah a lut tawh lo mai thei.

Kum 33 mi Roman Reigns hian Thawhṭanni zan khan WWE 'Raw' TV show-ah he thu hi a puang a, mipui a barakhaih hle. Reigns chuan, "Kum 22 mi ka nih khan leukemia ka vei tih hriat chhuah a ni a, kum 11 zet min chenchilh ta a ni. He natnahian min chenchilh tlat avangin ring chhung ka lut thei tawh dawn lo a, hreh tak chunga he thu hi sawi a ngai ta mai hi hreawm ta ti tak zet a ni," a ti.

American professional wrestler chuan sawi zawmin, "Khatih hunlai khan ka nuna hun harsa leh khirh ber ka tawng a ni. Hna ka nei lo a, in lah ka nei hek lo. Football ka khel a, hun ṭha min siam sak avangin WWE ka luhchilh leh thei bawk a, ka lawm tak zet a ni," tiin, hun harsa tak a paltalng thu a sawi.

Roman Reigns hi a hming tak chu Leati Joseph Anoa a ni a, American football league - National Football League player ṭhin a ni. Georgia Tech tan a khel ṭhin a, kum 2007 khan Vikings tan contract a ziak a, mahse season khat chhiah a khel a ni.

American football chawlhsanin WWE-ah a zuanglut a, Roman Reigns tih hming a lo pu ta a ni. A ring name 'Roman Reigns' hi a larpui hle a, WWE huangah chuan lawm hlawh ber te zinga mi a ni.

Thisen cancer chikhat leukae­mia avang hian ring chhungah hmuh tur a awm tawh dawn lo va, WWE Universal Championship belt pawh a hreng zui thei dawn ta lo a ni.