Russia-in Ukraine a rûn chhehvel ; Elon Musk 'Starlink Service' Ukraine-ah tinung

SpaceX billionaire Elon Musk chuan Inrinni khan a company Starlink satellite broadband service chu Ukraine-ah tihnun a nih thu Twitter kaltlanga puangzarin, SpaceX chuan terminal tam zawk a thawn lut dawn tih a sawi bawk.

Musk chuan,"Ukraine-ah Starlink service a hman theih ta. Terminal dang pawh thawn mek a ni," tiin a tweet. Russia-in a rûn avangin Ukraine-ah hian Internet lamah harsatna a awm a, chumi avang chuan Elon Musk chuan Starlink satellite broadband service chu hman theihin a siam a ni.

Internet hi a bikin Russia ram hmar lam leh khawchhak lamah a chhe zual hle a, henglai hmun hi indona nasat zualna hmun niin, satellite technology hi hautak hle mah se hmun kilkhawr zawk leh thingtlanga awm, fibre optic cable leh cell towers awm lohna hmuna khawsate tan chuan a ṭangkai viau thung.

Ukraine Vice Prime Minister Mykhailo Fedorov-in Starlink station an rama hung tura a ngenna a chhannaah Elon Music hian hemi chungchang hi a sawi chhuak a ni. Mykhailo Fedorov hian Twitter kaltlangin Musk hi a ngen a, a ngen aṭanga darkar 10 hnu velah ani hian a chhang let a ni.

Russia do let turin Miss Grand Ukraine hlui inpe
Miss Grand Ukraine hlui Anastasia Lenna chu Russia do let turin a inpe.

Russia ramin Ukraine a rûn vangin Ukraine mi tam tak chu an ralthuamte lek chhuakin Russia sipaite do turin an inpe a, civil mi eng emaw zat ralthuam kenga an thlalak pawh a darh tawh a, tunah chuan beauty queen, Miss Grand Ukraine hlui Anastasia Lenna pawh a ram chhan turin a inpe ve ta a ni.

Anastasia Lenna hian Instagram lamah ralthuam kenga a thlalak chu a pho chhuak a, chu chuan ngaihven a hlawhin a viral rang hle a, media hrang hrang ngaihven pawh a hlawh zui hle bawk.

Lenna hian Kum 2015 khan Miss Grand International beauty contest-ah Ukraine ai a awh a ni.

Eurovision 2022-ah Russia tel phal lo
European Braodcasting Union chuan Eurovision 2022-ah Russia tel a khap.

EBU hian Ningani liam ta khan kumtina an buatsaih ṭhin Europe ram hrang hrang inelna Eurovision Song Contest chu politics nena inhnamhnawihna nei lo a nih avangin Russia pawh an tel an phalsak dawn tho tih an lo tarlang tawh a, mahse, Zirtawpni khan thuchhuah dang siam lehin kumin Eurovision-ah Russia an tel theih dawn loh thu an puangzar leh ta a ni.

Ukraine a rûn avanga ram hrang hrangin an dem mek Russia intihsiaknaa a tel a nih chuan Eurovision chu a hminghliau mai theih avangin Russia chu an tel thei dawn lo tih an tarlang.

Facebook leh Google-in Russia state media ads a khap
Facebook chuan thuchhuah siamin an social media platform kaltlanga Russia state media-te'n sum an lakluh theihna chu an khap tih an sawi.

Social media giant security policy head Nathaniel Gleicher chuan,"Russia state media-te'n kan platform kaltlanga ads emaw sum an lakluh theiha reng reng chu khawvel pumah kan khap tawh a ni," tiin Zirtawpni khan Twitter kaltlangin a puangzar.

Facebook parent company Meta pawhin Zirtawpni vek khan Russia thuneitute'n an platform-a fact checker leh content warning labels-te hmang lo tura an tih chu duh loin Russia lakah khuahkhirhna khauh zawk an siam dawn tih an sawi ve bawk.

Facebook-in Russia ads a ban hnu lawkah hian Google lam pawhin thuchhuah siam vein Russia ads chu an khap ve tih an tarlang a ni. Inrinni khan hemi chungchang hi Google lam hian an puangzar a ni.