South Korea sorkarin BTS chawimawi

South Korean Boy Band lar BTS chu ropuina ramah an chen chhunzawm zel a, an ram sorkar chuan chawimawina sang 'Order of Cultural Merit' a hlan.

South Korea sorkar chuan Nilaini khan an ram khaw­pui Seoul-ah Korean Popular Culture & Arts Award a buat­saih a, he hunah hian an ram tihming ṭhatu BTS te henah chawimawina hi hlan a ni.

BTS member pasarih - RM (Kim Namjoon), Suga (Min Yoongi), J-Hope (Jung Hoseok), Jin (Kim Seokjin) Park Jimin, V (Kim Taehyung) leh Jeon Jungkook te chu 'Order of Cultural Merit' dawng thei naupang ber an ni ta a ni.

South Korean prime minister Lee Nak-yeon chuan BTS te hnena chawimawina hlan tur thu hi a lo puang tawh a, Cabinet-in a pawmpui thlap a ni. Lee Nak-yeon chuan, "BTS te hi khawvel puma Korean culture leh ṭawng thehlartu an nih thu sawiin, chawimawina hlan hi an phu hle a ni," tiin a lo sawi tawh bawk.

BTS hi September thla khan United Nations General Assembly-ah an lo inlan tawh bawk a, thusawina hun pawh pek an ni.