Miss Grand International 2018 CLARA SOSA 1st runner-up India nula Meenakshi Chaudhary
Miss Grand International 2018 chu Ningani khan zawhfel a ni ta a, Paraguay nula Clara Sosa chuan lallukhum a khum a ni. India aiawhtu Meenakshi Chaudhary chu fisrt runner-up niin, Indonesia nula Nadia Purwoko chu second runner-up a ni.
Miss Grand International vawi rukna hi Myanmar-ah neih niin, ram hrang hrang aṭangin nula kei ka ni inti ṭhah mi 75 zet an fuan khawm a ni. Chung zingah chuan Paraguay aiawhtu Clara Sosa chhingzo an awm lo a, Miss Grand International 2018 atan thlan a ni ta a ni. Peru nula Maria Jose Lora chu nikum khan Miss Grand International atan hian thlan a lo ni tawh a, Clara Sosa hian a lalṭhuthleng a rawn luahve leh ta a ni.
fbb Colors Femina Miss India 2018, Meenakshi Chaudhary chuan a tum ram thleng phak lo mah se 1st runner-up a ni a, India a ti hmingṭha hle. Meenakshi hian intihsiak neih chhung hian lawm a hlawh hle a, Miss Grand International 2018 ni thei hial tura beisei a ni. A tawpah erawh pahnihna-ah a lungawi a ngai ta zawk a ni.
Puerto Rico nula Nadia Colon Rivera chu 3rd runner-up niin, Japan aiawha tel Haruka Oda chu 4th runner-up a ni. Top 10-ah hian Dominic Republic, Mexico, Venezeula, Spain, Indonesia leh Vietnam nula te an lang bawk.
Mimal lawmman
Miss Grand International 2018-ah hian category panga-ah mimal lawmman siam a ni. Best Swimsuit atan Miss Grand Cuba, Gladys Carredeguas chu thlan a ni a, Miss Grand Vietnam, Nga Phuong Bui chuan Miss Popular Vote a la a ni.
Best National Costume atan Miss Grand Peru, Andrea Moberg chu thlan niin, Best Social Media sub-title chu Miss Grand Indonesia, Nadia Purwoko kutah hlan a ni bawk. Miss Grand Thailand, Moss Namoey Chanaphan chuan Best Evening Gown sub-title a la thung a ni.
Meenakshi Chaudhary
Chandigarh nula chhuanvawr Meenakshi Chaudhary hi February 1, 1999 khan a piang a, kum 19-na a hmang mek a ni. St. Soldier's Convention School, Chandigarh-ah lehkha zirin, tunah hian National Dental College and Hospital-ah zirna a chhunzawm leh mek a ni.
Amah hi feet 5 leh inches 7-a sang niin, kum naupangte ni chungin modelling lamah sulhnu a nei ṭha hle. Femina Miss India 2018-ah khan first runner-up a ni a, Miss Grand International 2018-ah India ai a awh zui ta a ni.
Meenakshi Chaudhary hian infiamna lam pawh a tithei hle a, swimming leh batminton-ah te state level intihsiakah a lo tel tawh ṭhin bawk.
Miss Grand International - Clara Sosa, Paraguay
1st runner-up - Meenakshi Chaudhary, India
2nd runner-up - Nadia Purwoko, Indonesia
3rd runner-up - Nadia Colon Rivera, Puerto Rico
4th runner-up - Haruka Oda, Japan
Best Swimsuit - Miss Grand Cuba Gladys Carredeguas
Miss Popular Vote - Miss Grand Vietnam Nga Phuong Bui
Best National Costume - Miss Grand Peru Andrea Moberg
Best Social Media - Miss Grand Indonesia Nadia Purwoko
Best Evening Gown - Miss Grand Thailand Moss Namoey Chanaphan