Box Office: Freaky a hmuhnawm

Box Office-ah film thar Freaky-in sum a lalut hnem ber a, Let Him Go chu pahnihna niin The War with Grandpa chu pathumna a ni.

Freaky Friday naupang thawnthu kha kan hre tawh ngai em le? Khami behchhan khan film pali lai siam ni tawhin tuna Box office-a sum lalut tam ber Freaky pawh hi khami twist kha ni lehin US-ah chuan hrileng karah pawh a hit hle.

Covid-19 hripui leng karah theatre 2,472 laiah tihchhuah niin $3,710,000 lai a lalut a, khawvel puma a sum lakluh chu $maktaduai 5.6 a tling tawh.

Freaky hi comedy horror film niin Christopher Landon-a film siam a ni a, a changtute pawh an ṭha hle. Vince Vaughn, Kathryn Newton, Katie Finneran, Celeste O'Connor, leh Alan Ruck-te channa niin lawm a hlawh hle aniang, producer Jasun Blum chuan a chhunzawmna siam leh chakawm a tih thu a sawichhuak hial.

Zirtawpni liam taa US-a tlangzarh Freaky-ah hian serial killer Blissfield Butcher chuan tleirawl/rawlthar pali rawng takin a that a, chu tualthattu rapthlak leh high school kal lai tleirawl pakhat chu an taksa an inthlak ta a ni. Chu tleirawl chuan a taksa ngai neih let lehna tur chuan darkar 24 chiah hun a nei a, chumi chhunga an inthlak leh hman loh chuan tualthattu taksaah chuan kumkhuaa a awm a ngai tawh dawn a ni. 

Kar hmasa lama pakhatna Let Him Go chu sum lalut tam ber dawttu niin theatre 2,458 aṭangin $1,800,000 a lalut. Pakhatna pawh lo ni tawh The War with Grandpa chuan $1,326,303 a lalut a, pathumna a ni ve bawk.

Pakhatna aṭanga pathumnate hi theatre sang hnih chuangah an pe chhuak a ni.

Box Office chart top 10-ah hian film thar pahnih a awm a, pakhat chu sum lalut tam ber Freaky hi niin pakhat chu pakuana True to the Game 2 a ni thung. True to the Game 2 hi chu theatre 281-ah chiah pek chhuah a ni a, $287,819 a lalut a ni. True to the Game 2 hi kum 2017-a tlangzarh True to the Game chhunzawmna kha niin a changtute pawh a ngai an ni hlawm.