Thor: Love and Thunder-ah Star-Lord

Thor: Love and Thunder-ah Guardian of the Galaxy member Chris Pratt-a Star-Lord chu a inlan dawn niin an sawi.

Pratt hian Peter Quill/ Star-Lord lema a rawn inlan leh tur hi fan tam tak tan chuan thu lawmawm tak a nih ngei a rinawm a, chutihrual chuan Avengers: Endgame tawpa Guardians of the Galaxy spaceship-a Thor a chuan ve avang erawh kha chuan mi tam tak chuan mak an ti hran lo thung ang. Groot-a aw atana a aw thawhtu Vin Diesel pawhin Guardians of the Galaxy chu Thor: Love and Thunder peng pakhat a ni dawn tih a lo sawi thawi zauh tawh bawk nen, midang pawh kan hmu thut mai thei!

Thor: Love and Thunder-a Chris Pratt a inlan tur chungchang hi The Holly­wood Reporter chuan an tarlang hmasa ber a ni. March thlaah daih tawh khan Vin Diesel chuan Waititi-a'n Thor film thar leh  Guardians of the Galaxy chuan inzawmna a nei dawn tih a sawi chhuak a nih kha, hei hi nem­nghehin a rawn awm ta niin a lang.

Nakkum January thla hian Marvel film tho Shang-Chi and the Legend of the Ten Rings an channa hmun Australia-ah Thor: Love and Thunder hi an chang ṭan dawn a,  Taika Waititi bawkin a direct leh dawn a, a hmunnawm leh hle ang. A changtu tur pawh hriat chinah an ṭha rual ṭhe ṭhaw hle a,  Natalie Portman chu Jane Foster / Mighty Thor lemah a chang nawn leh dawn a, Valkyrie lemah Tessa Thompson chu chang leh dawn bawkin Christian Bale chu misual a ni dawn a, Korg lemah Waititi a chang dawn bawk.

Thor: Love and Thunder hi Thor film palina tur niin MCU Phase Four film pangana tur a ni dawn bawk a, MCU phase four-ah hian Thor hma hian Black Widow, Shang-Chi and the Legend of the Ten Rings,  Eternals leh Spider-Man-te kan hmu dawn a ni.