Green Day-in Russia-a concert tur ṭhulh

American rock band Green Day chuan Pathianni khan Instagram lamah thuchhuah siamin Moscow Spartak Stadium-a concert an neih tur chu an ṭhulh tih an sawi.

Green Day chuan boruak awm dan thlir chungin tun dinhmunah chuan Moscow lama show an neih tur chu ṭhulh mai a ṭul tih an tarlang a, hun lo la awm leh turah hun remchang dang a awm leh ngei an rin thu sawiin ticket lo lei tawhte pawhin an refund theih thu an tarlang a ni.

'Wake Me Up When September Ends' hitmaker-te hi May 29 hian Russia lamah hian show nei tur an ni a, chumi zawh hnuah chuan European tour neih chhunzawm an tum a ni. Green Day hma hian AJR chuan October-a show a neih tur chu a ṭhulh thu a lo sawi tawh bawk.

Khalid, OneRepublic, Yungblud, Girl in Red, Judas Priest, Denzel Curry leh One Republic-te chu tunhnaia Moscow lama show nei tura inruahman an ni a, mahse artist tam zawk hi chuan an ṭhulh leh a rinawm.