Stacy album hmahruai kan hmu zel 'Thlen ka nghakhlel' a peih fel
Keini ngaihah chuan 'Ni li pawn tlai se' tih hi kum a vei viau hman a, tunah chuan Stacy VL Muanpuii album tak tak a hnai ta. A album hmahruai atan 'Kan hneh zel dawn' tiin mual a rawn chuang chhuak tê tê a, 'Thlen ka nghakhlel' tih hla hmangin min rawn chhilh zui leh ta a ni.
Stacy hian a album hmahruai atan, a album-a hla awm tur dang pakhat 'Thlen ka nghakhlel' tih chu a ti chhuak leh ta a ni. Ṭhazual chart-ah pawh pakhatna lo luah fo tawh Stacy music video thar hi en tichakawm zualtu pakhat a awm a, chu chu Mizo mipa Gospel singer lar leh hlawhtling Andrew Laltlankima a ni!
He hla hi Andrew-a phuah hi a ni a, ram pum huapa kan sakpui luih luih thei khawpa lar 'Nunna Thar' pawh lo phuah tawhtu kha a nih vangin beisei pawh a sang hle a ni. Andrew-a'n duh thala a remkhawm Stacy-i ngei maiin a sa tur hi ngaihthlak a chakawm tawh tak zet a ni.
A hla mai bakah hian he music video siam leh recording lama Stacy puitute aṭang hian music video chhuanawm tak a ni ngei ang. Video hi Siama (SVP) ngei mai kutchhuak a ni a, soundtrack hi The Prophets guitarist, Eric Renza kuthnu a ni a, Blue Wave Records-a record a ni. A part lo petute pawh an neu lo lehpek khawp mai; 'Ka rinchhan Lalpa' hla nena Ṭhazual Fakna chart-a pakhatna lo luah tawh, Lalremsiami, Nunu-i leh Abe-a te an ni nawk.
Stacy hian album a buatsaih sauh sauh bakah November thla hian video dang tihchhuah leh tumin hma a la mek bawk. Tihchhuah a tum hi khawvel puma Kristiante hla lar leh chuai thei lo 'I rinawm ropuizia' (Great is thy faithfulness) tih kha a ni. Stacy hian Synod Choir-a a awm tawh loh hnuah music video leh album lam a buatsaih chho fat fat reng a, hma pawh a la thui tawh hle. Album a tihchhuah tur hi 'Lal chawimawina' tih a ni dawn a, engtikah nge a tihchhuah theih chiah ang tih chu sawi chiang thei lo mah se, kumin hi chuan peih fel hman a tum a; kumin kum tawp lam hi Krismas boruakin min nan chhoh tawh mai dawn avangin nakkum kum tir lam hi chuan Gospel album thar ṭha zet mai hmuh inring ila kan tisual lo mai thei.
Stacy-i hian a album-a hla te hi music video-a siam vek a tum lem lo a, pathum emaw pali emaw vel siam a tum a, a bak hi chu audio-in a nih a rinawm.
Stacy VL Muanpuii music video thar 'Thlen ka nghakhlel' hi zanin hian Zonet-ah tihchhuah beisei a ni.