Super Bowl Halftime Show-a inlan duh lo langzar zual te Rihana, JAY-Z, Cardi B & Adele

American Football ngainatu ten an nghah­hleh em em leh, khawvelin a hmuh chak ṭhin chu Super Bowl a ni. National Football League (NFL) hnuaia intihsiakna ngaihhlut ber Super Bowl-ah hian Halftime Show ropui tak a awm ṭhin a, chu chu khawvelin a thlir chak chu a ni.

Super Bowl Halftime Show-ah hian khaw­vel huapa zaithiam lar ber ber te an inlan ṭhin a, entu pawh an tam thei na ngiang mai. Kum 2015 khan Katy Perry chu Super Bowl XLIX-ah perform-in mi maktaduai 120 dawnin an en a, US history-a television broadcast zinga entu ngah ber record a siam hial a ni.

Heti khawpa US mipui leh khawvelin a hmuh chak Super Bowl Halftime Show-ah hian zaithiam eng emaw zat chuan perform tura sawmna an lo hnar tawh a, chung zingah chuan Cardi B, Adele, JAY-Z leh Rihana te pawh an tel. Rihana hi tun hnaia sawmna hnar langsar a ni a, 2019 Super Bowl Halftime Show-ah inlan tura sawm ni mah se an hnar a ni.

Rihana

Barbadian singer hi Super Bowl LIII-ah perform tura ngaih a ni a, amaherawh chu sawmna duhawm tak hi a hnar ta zawk a ni. Rihanna inlan duh loh chhanah hian zawhna atam hle a, chi inthliarna duh lotu langsar tak Colin Kaepernick a thlawp vang niin an sawi. American football player Colin Kaepernick hi chi inthliarna dodaltu langsar tak niin, chi inthliarna rawngkaia police-te chetna duh lohna lantira US hnam hla sak laia ding duh lo leh ṭhingṭhi ngam ngat a ni.

Kaepernick ngaihdan hi Rihana pawh hian thlawpin, Super Bowl LIII-ah hian a inlan loh phah ṭhak dawn a ni. American stand-up comedian Amy Schumer pawhin Kaepernick hi a tlawp thu leh, Rihana thutlukna chu a pawmpui thu a lo sawi ve mek bawk.

JAY-Z

American rapper JAY-Z chu American mipuiten an ngaihhlut em em Super Bowl Halftime Show-ah inlan tura sawmna dawng zingah a tel. JAY-Z hi Beyonce nena an hla hit 'Apeshit' sa dun tura sawi rik niin, he hla-ah hian Quavo leh Offset ten an feat a ni.

Kum 48 mi JAY-Z chuan, "Super Bowl-ah maw! Min mamawh a, kei chuan ka mamawh ve lo a ni," tiin ngeiawm takin a ṭawng chhuak. A la duh tawk mai lo a, "NFL official te lo hrilh rawh u, keini pawh stadium-ah kan awm ve tho," tiin a sawi a, a perform loh hmel hle!

Cardi B

American rapper Cardi B chu 2019 Super Bowl Halftime Show-a perform tur zingah sawi rik a ni a, a tihlawhtling dawn lo niin a lang. Cardi B chuan, "Kaepernick thlawptu ka ni a, a ṭhingṭhit rual khan keipawh ka ṭhingṭhi ve a ni. Kaepernick hi NFL hian an kokir leh anih loh chuan Super Bowl Halftime Show-ah hian ka inlan lo ang," tiin, 2017 MTV Video Music Award-ah a lo sawi tawh a ni.

Rin ang ngeiin Cardi B hi Maroon 5 te nena an hla hit 'Girls Like You' perform ho tur anga sawi rik an ni a, an inlan ang em tih chu a hriat thuai dawn ni.

Adele

British singer Adele chuan kum 2016 khan Staples Center, Los Angeles-ah inlanna hun ṭha a lo nei tawh a, mahse a tihlawhtling tlat lo. Hetih hun lai hian Adele hi 2017 Super Bowl Halftime Show-ah inlan tura sawi rik a ni bawk a, mahse a thleng ta chuang lo bawk.

Adele chuan sawmna a dawn ṭum hian, "Super Bowl hian music nen inzawmna a nei lo a, inhnamhnawihna chhan tur ka nei lo. Kei hian tih theih engmah ka nei lo ang, chuvangin 'No' ka ti ta a ni," tiin, Super Bowl leh music-in inzawmna a neih loh thu a sawi.

Adele chhanna hian NFL official te a tilawm lo hle a, Super Bowl Halftime Show-ah inlan tura an sawm tawh ngai loh tur thu an tarlang hial a ni.

Nakkum February 3-a Mercedes-Benz Stadium-a neih tur Super Bowl LIII Halftime Show-ah hian tunge inlan ang tih chu rinthiam harsa tak a ni a, mipui lam pawhin an inrinsiak nasa hle. American pop rock band lar Maroon 5 te thawm a ri ring hle a, American rapper Cardi B chu beiseiawmah an la ngai. Maroon 5 leh Cardi B te hla hit ''Girls Like You' hi Super Bowl-ah hian ngaihthlak tur a awm ang em tih chu hunin a la hril dawn a ni.