Hontrade International Ṭhazual Lengzem ; A zawna No.1 hauh thei Rachel Lalnunkimi

'Mai a lum e' tih hla hmangin a rawn comeback a, hlawhtlinnain a zui zat bawk. Mizo Idol star Rachel Lalnunkimi chuan Hontrade International Ṭhazual Lengzem chart-ah No.1 a hauh a, a zawna dinhmun sang ber a luahna a ni ta.

Venghlui-a cheng ṭhin, Mission Vengthlanga insawn ta Rachel-i hian August thla khan MPL kick-off-ah a music video thar 'Mai a lum e' tih chu a tlangzarh a, Ṭhazual chart-ah kan hmu nghal chat. A tirah sang takah invawrh nghal lo mah se zawi zawin hma a sawn a, dinhmun sang ber a luah ta a ni. No. 1 hauh tur hian hun a mamawh rei lo a, mipuiin a zai an ngaina tih a chiang hle.

Kumina Rachel-i music video hmasa ber hi tunlai Lengzem hla-ah chuan thlan hlawh ber a ni a, YouTube lamah pawh entu an ṭhahnem tawh hle. He hla hi Mystic Sailo phuah niin, Video hi Roar Video Production (Atea) kutchhuak a ni.

Tun ṭum-ah hian chart hmasa lama palina Zauvi chu pahnihna-ah a inhlangkai a, 'I leng dun zel ang' tih hla hmangin Ma­nuna & Feli Fanai te chu top 3-ah an lang bawk. Feli Fanai leh Ma­nuna te hian chart-ah dinhmun sang an luah rei ta viau a, No.1 hauh thei dinhmunah an ding mek bawk.

Zorinzuali Khiangte chuan a hla hit 'Min hnawl si maw' hmangin palina a hauh a, Marina Vanhriatpuii Varte chu chu top 5-ah a lang bawk. Marina-i hian top 10-a lang phak hla pahnih a nei a, 'Zawlpala leh Tualvungi' tih chu pariatna-ah a awm a ni.

Mizo Idol star Mathlenga leh Thiamchantira te chuan parukna leh pasarihna an hauh. Mathlenga hian 'Tawn thar D' tih hla hmangin a dinhmun a siamṭha leh mek a, Thiamchantira pawhin 'I zun ngaiha hi' tih hla a larpui leh mek. Top 10-ah hian Mimi Lalhruaitluangi leh Josephine Lalawmpuii te an lang bawk.