Thai puk aṭanga chhanchhuah Wild Boars team ten Old Trafford-ah inkhel an en

A hun laiin hreawm tam tak tuar mah se tuna an chan erawh an suangtuah phak bak pawh a ni hial ta ve ang. Thailand-a puk pakhat Tham Luang cave-a ni eng emaw zat an tan hnua him tak an chhanchhuah, Wild Boars youth team player te chuan Pathianni zan khan Old Trafford-ah Manchester United leh Everton inkhel an en.

Inkhel ṭan hma hian Wild Boars player te hi Jose Mourinho leh Manchester United player te hmuhna hun siam sak an ni a, Inrinni khan United training grounnd-ah hun an lo hmang tawh bawk. He hunah hian Mourinho bakah, Paul Pogba leh Ander Herrera te ho nen thla an la ho a ni.

Pathianni zan khan United-in Everton an hneh lai hi a hmunah an en a, Old Trafford-ah hian VIP treatment pek an ni nghe nghe. United scarf a sen leh var inpawlh chu an awrh far a, TV lamah pawh an hmel hi hmuh tur a awm a ni. Player naupang 12 leh an coach Ekkapol Ake Chantawong te hi director box-ah ṭhut tir an ni.

Wild Boars youth team player leh an coach te hi thla hmasa lawk khan The Ellen DeGeneres Show-ah an lo inlan tawh a, hemi ṭum hian Manchester United player hlui Zlatan Ibrahimovic chuan sawilawk loin heng naupang te hi hun a hmanpui a ni. Ibrahimovic chuan "Khawvela team ṭha ber in la ni thei a ni" tiin a fuih bawk a ni.

Show-a an inlan hnu hian International Olympic Committee (IOC) sawmna angin Argentina an pan leh a, Youth Olympic Games an chhim a ni. Argentina-ah hian Monumental Stadium-ah friendly match khelhpui an ni nghe nghe.

Thai soccer team Wild Boars player 12 leh an coach te hi kumin July thla khan Tham Luang cave-ah ni 18 zet an tan hnuin chhanchhuah an ni a, khawvelin an chanchin hi a ngaihven phah hle a ni.