Box Office ; Halloween khum thei la awm lo
American actress Jamie Lee Curtis channa 'Halloween' chu Box Office-ah nekchhuak thei an la awm lo a, a zawnin sum lalut hnem ber dinhmun a luah. Halloween hian kar liam ta khan $mtd 32 a lalut leh a, a sum lakluh tawh zawng zawng chu $mtd 170 chuang zet a ni.
Halloween hi October 19 khan tlangzarh a ni a, a siam nan hian $mtd 10 vel an hmang a ni. Release aṭanga ni tam pawh a liam hmain $mtd 180 dawn a lalut der tawh a, October thla-a film chhuak tawh zinga kar khat chhunga sum lalut hnem ber dawttu a ni nghe nghe.
Halloween hi October thla chhunga film tlangzarh tawh zinga sum lalut hnem ber dawttu a ni bawk a, a tluk loh awm chhun chu Venom a ni. British actor Tom Hardy channa Venom hian tlangzarh kar khan $mtd 80 zet a laut a, October thla-a film chhuak tawh zingah sum lalut hnem ber a ni.
Mystery/slasher film Halloween hi kum 1978 khan a vawi khat nan tihchhuah a ni a, en a hlawh hle a nih kha. Tun hnaiah siam thar leh a ni a, a la hit rem rem hle. Tlangzarh kar khan $mtd 77 zet a lalut a, Box Office-ah record a siam hial a ni.
He film ṭihbaiawm takah hian American actress Jamie Lee Curtis chu a changtu nu ber a ni a, Judy Greer leh Nick Castle ten role pawimawh tak an play bawk.
American actor Bradley Cooper leh singer Lady Gaga te channa 'A Star Is Born' chu a dinhmun ngaiah pawh a awm leh a, sum lalut tam pahnihna a ni. A Star is Born hian $14 a lalut leh a, entu an tlahniam mawh hle. Hetih lai hian No.1 pawh lo hauh tawh Venom chu sum lalut tam pathumn a ni a, kar liam ta chhung khan $mtd 10 a lalut ve leh a ni.
October 12-a tlangzarh Goosebumps 2: Haunted Halloween chu sum laltu tam palina a ni a, Hunter Killer chuan a dawt. The Hate U Give, First Man, Smallfoot, Night School leh Mid90s te chu top 10-ah an lang bawk.
London Fields a flop
Tun hnia film tlangzarh zinga thawm nei lian ber tih ngam chu American actress Amber Heard channa 'London Fields' a ni. He mystery/crime film hi kar kalta Zirtawpni khan US-ah tlangzarh a ni a, beisei angin a che ṭha lo hle. Box Office-ah a hmel hmuh tur a awm lo a, top 10 huang kai tur pawhin a hmabak a ko hle a ni.
'London Fields'-ah hian Amber Heard bakah, British actor Theo James leh English model chhelo Cara Delevingne te an chang a, sum lakluh kawngah erawh eng teh ruai an ang chuang lo a ni.
Box Office Top 10
1. Halloween - $32
2. A Star is Born - $14
3. Venom - $10
4. Goosebumps 2: Haunted Halloween - $7.2
5. Hunter Killer - $6.6
6. The Hate U Give - $5.1
7. First Man - $4.8
8. Smallfoot - $4.7
9. Night School - $3.2
10 Mid90s - $2.9