Helicopter tla-a nunna chan zingah Miss Universe Thailand runner-up

Ṭum dang ang bawkin Inrinni zan khan English Premier League (EPL) chu khelh a ni a, vanduaina rapthlak tak a thleng ang tih tuman an ring pha lo. Hetih lai hian Leicester City leh West Ham United te inkhelh zawha thil thleng erawhin khawvel a barakhaih a, mi tam tak biangah mitui a luang a ni.

Inkhel zawh hnu hian Leicester City neitu Vichai Srivaddhanaprabha chuan helicopter hmangin field a chhuahsan a, midang pali an chuang ve bawk. An thlawhchhuah aṭanga rei lo teah vanduain a thleng ta a, Helicopter chu stadium pawn aṭanga hnaiteah tlain, a kang ta chiam a ni. A chuang mi panga te hi an thi vek a, chung zingah chuan Miss Universe Thailand 2005 runner-up Nursara Suknamai pawh a tel.

Nursara Suknamai hi June 8, 1985 khan a piang a, Bangkok-a seilian a ni. Suknamai hi Thailand 'Beauty Queen' an tih zinga mi niin hriat pawh a hlawh hle a ni. Kum 2005-a Thailand-a Miss Universe thlanna neih a nih khan an ram aiawhin a tel a, pahnihna dinhum a hauh phak hial a ni. Miss Intercontinental Thailand atan hlan a lo ni tawh bawk a, hemi kum vek hian Miss Photogenic atan thlan a ni bawk.

Kum 33 mi Nursara Suknamai hi Leicester City player leh staff te pawhin an ngainat rawn a ni a, uitu pawh a ngah hle a ni. English player Harry Maguire leh Jamie Vardy te chuan amah an uina thu an sawi tawh a, player dangte pawhin an uithu an sawi hlawm bawk.

Nursara Suknamai hian football a ngaina hle a, player te nen pawh an inhmelhriat ṭha hle a ni. Vanduaina thlen zan pawh hian inkhel hi a hmunah a en a ni. Nursara Suknamai hi Srivaddhanaprabha hnungzuitu rinawm tak zinga mi niin, King Power leh Leicester chhungkuaa tla tlum tak a ni.