IFPI Global Digital Single Award 2021 The Weeknd-an 'Save Your Tears' hmangin dawng

Global recorded music body International Federation of the Phonographic Industry (IFPI) chuan The Weeknd hit single 'Save Your Tears' chu 2021 Global Digital Single Award a hlan.

IFPI hian he chawimawina hi nikum chhunga single hralh kal ber chuan a dawng tih sawiin platform hrang hrang- paid subscription streaming, ad-supported platform bakah single-track download leh stream zawng zawngah The Weeknd 'Save Your Tears' hi hralh a kal ber tih an sawi a ni.

▶ The Weeknd hi IFPI Global Digital Single Award kum zawna dawng thei hmasa ber a ni

The Weeknd hian record thar a siam nghe nghe a, IFPI Global Digital Single Award 2022 chu a single 'Blinding Lights' hmang khan a lo dawng tawh a, artist zinga he award a kum zawna dawng thei hmasa ber hi a ni hial.

'Save Your Tears' hi The Weeknd studio album palina 'After Hours'-a single palina a ni a, tlangzarh a nih tirh aṭang khan a hit rem rem hle a, ram hrang hrang chart-ah topper a nih bakah Ariana Grande nena remix version an tihchhuah pawh US-ah chuan No.1 a ni leh thei bawk. He hla hi vawi 14 platinum-ah puan a ni tawh nghe nghe a, IFPI-in a tarlan dan phei chuan Global Subscription Streams Equivalent-ah tluklehdingawn 2.15 lai a hmu a ni.

Che ṭhazual dangte
A vawi khatna atan Global Digital Single chart-ah The Kid LAROI hming pawh a rawn lang ve a, Justin Bieber nena an sak dun STAY chu nikum chhunga Global Subscription Streams Equivalent hmu chhuak tam ber dawttu niin tld. 2.07 a hmu.

Dua Lipa 'Levitating' chu pathumna a ni thung a, BTS 'Butter' chu palina niin Olivia Rodrigo 'drivers license' chu pangana a ni. Olivia Rodrigo hi nikum chhung khan a lar vet vet bawk a, he chart-ah hian a hla pahnih lai a lang. 'good 4 u' chu pariatnaah a awm bawk a ni.

The Weeknd 'Blinding Lights' pawh top 10-ah a lang pha leh a, pasarihna a ni a, Justin Bieber pawh a hming lang nawn zingah telin 'Peaches' chu parukna a nihpui ve bawk.