Russia-ah Disney, Warner leh Sony-te'n Film tlangzarh dawn rih lo

Russia-in Ukraine a rûn vanga buaina kal zelah Warner Bros, Disney leh Sony-te chuan Russia cinema-a chhuah turin film an tlangzarh dawn rih lo.

Heng film siamtu company lian pathum hian tunhnaiah hian film en chakawm tak tak tlangzarh tur an nei nual a, chung zingah chuan kar tawpa an tlangzarh tur The Batman-te, kar leh lama tlangzarh tur 'Turning Red' bakah April thla tir lama tihchhuah an tum 'Morbius'-te pawh telin heng film thawm nei ring tak takte hi Russia mipuite chuan an en thei dawn ta rih lo a ni.

WarnerMedia thupuangtu chuan,"Ukraine-a buaina chhuak mek vangin, WarnerMedia chuan Russia ramah a feature film 'The Batman' chu a tlangzarh rih dawn lo a ni," tiin Zirtawpnia Russia rama tlangzarh an tum tawh chu an ṭhulh thu a sawi.

Disney lam pawhin thuchhuah siamin,"Ukraine ram beih a nih vang leh mihring tawrhna nasa tak a thlen avangin Russia ram theatre-a film tlangzarh tur chu kan chawl rih dawn a ni," an ti.

Sony lam pawhin Morbius chu Russia ramah an tlangzarh dawn rih lo tih sawiin Russia ramah film an tlangzarh dawn rih loh thu an sawi a, buaina pawh chinfel thuai a nih an beisei thu an sawi bawk.