Zorinsanga Sailo Music video thar 'Lawmna hla'

February thla khan music video 'Min hual reng ṭhin' a tichhuak a, Ṭhazual Chart-ah pawh hun rei tak chhung No.1 a hauh a nih kha. Praise On star Zorinsanga Sailo chuan music video thar 'Lawmna hla' tih chu a peih fel leh ta a, zaninah Zonet-ah tichhuah a ni ang.

Hla lehlin chu...
Zorina music video hit tak mai 'Min hual reng ṭhin' tih hla kha zaithiam Amtea lehlin a ni a, a mawi zia sawi nawn a ngai tawh lo. A music video thar 'Lawmna hla' tih pawh hi C. Zoremsanga lehlin a ni a, Zorina hian a sa mawi leh pek hle. A zai ngainatute tan chuan nghahhlelhawm tawh tak a ni a, Ṭhazual chart lamah pawh a thlen san leh ngei a beisei awm viau bawk.

Music Track hi Lal K Sailo siam niin, recording hi Kings & Prophets-ah tih a ni. Video hi Andrew Lalbiaknunga (ALAR) kutchhuak a ni a, a music video hmasa zawk pawh kha Andrew-a siam tho hi a ni.

Hmachhawp
Praise On 2016-a pahnihna Zorina hian sawmna a dawng nasa hle a, hmun hrang hrangah zaia rawngbawlna neiin a fehchhuah ṭhin a ni. Hemi karah hian music video a buaipui ve reng a, kumina a pahnihna tur pawh hi a peihfel leh ta a ni.

Zorina hian a la duh tawk mai lo a, nakkum kum tir lama tlangzarh turin muisc video a buaipui leh mek bawk. Hei bakah hian Praise On 2016-a top 3 te khan music video pui tham tak an siam dawn a, inbuatsaihna an kalpui mup mup a ni.

Ramhlun North tlangval Zorin­sanga Sailo hian music video panga a tichhuak tawh a, tun ṭuma a music video hi Music Domain Mizoram (MDM) library-ah dahluh niin, Zonet leh MDM YouTube lamah te en tur a awm thuai dawn a ni.