Ticos-a music video hmasa ber Krismas Kawrmawi!

Mizo Idol star Ticos Dar­hming­liana chuan a music video hmasa ber 'Krismas Kawrmawi' chu a peih fel ta a, zaninah Zonet Zawlbuk-ah tihchhuah a ni ang.

'Cheng sawm-in' tia naupang hoin an hriat mai, he hla hi Reckson V.L Pachuau phuah niin, music video pawh siam a lo ni tawh. Mizo Idol Season 6-a pathumna Ticos-a chuan music video hi a rawn siam thar ve leh ta a, ngaithlak chakawm tawh tak a ni.

Ticos-a hi Children Christian Fellowship (CCF) Zotlang leh Stanley Khiangte ten an zaipui a, backing vocals pawh Zonet Mizo Idol judge Feli Thangluah chuan a pek sak bawk.

Music track hi Foster Recor­ding siam sak a ni a, re­cor­ding pawh hi an siam sak a ni. A hla hi Music Domain Mizoram (MDM) library-ah dah luh niin, YouTube lamah pawh en tur a awm thuai dawn a ni.

Hmanah chuan!
'Krismas Kawrmawi' tih hla hi a larna rei ta viau a - Krismas a lo herchhuah hi chuan kan hla ngaithlak tam ber te zinga mi a ni ṭhin.

Reckson V.L Pachuau chuan kum 2006 khan he hla hi a phuah chhuak a, Joseph Zaihmingthanga, Gracy leh Debbie ten an sa a ni. A music video hi August 2011 khan YouTube-ah upload a ni a, entu an ṭhahnem tawh hle.

Kum 10 chuang a liam hnuah music video siam thar a ni leh ta a, a tirah music video-a chang mipa naupang pawhin B.A a zir tawh a ni! Naupang zaipawla tel ho pawh Kohhrana mi ṭangkai tak tak an ni tawh hlawm a ni.

A hmaa music video hi a ṭha hle a, chutih rual chuan siam thar a ni leh ta pawh hi lawmawm. Ticos-a music video bikah hian drama hmuhnawm tak zeh tel a ni bawk a, mit leh beng a ti tlai hle tura ngaih a ni. 'Krismas Kawrmawi' hi VIOLETS te chuan an sponsor a ni.