Northeast Festival-ah Escape-a leh Feli Fanai

Northeast Festival chu October 26-28 chhung khan Delhi-ah neih a ni a, Mizo designer lar Escape Engmawia leh zaithiam Feli Fanai te an tel.

Northeast Festival hi Delhi-a neih ṭhin niin Festival lian leh ṭhang duang tak a ni a, ngaihven pawh a hlawh hle. Kuminah hian IGNCA Janpath-ah neih a ni a, hmarchhak state hrang hrang aṭangfin mi ṭhahnem tak an fuan khawm a ni.

Hnam hrang hrangte culture pholan a ni a, an thil siam chhuah hrang hrang tarlan a ni bawk. Fashion Show a awm bawk a, festival chhimtu ten an hlut hle.

Fashion Show hi zantin neih a ni a, state tin aṭanga thlan chhuah designer pakhat ṭheuh ten an kutchhuak an pholang a ni. Mizoram aṭanga tel Escape Engmawia kut chhuak Mizo puan tah hrang hrang te chu model 16 zetin an inbel a ni. Model ten ramp an zawh lai hian Escape brand ambassador Feli Fanai chu live-in a perform a, mipuiin an hlut hle a ni.

Feli hi live-a a perform bakah hla pathum a sa bawk a, show tihmuhnawtu zinga mi a ni chiang hle. Ani bakah hian Melody G Fanai chuan Hindi hla a sa bawk. He festival-ah hian state hrang hrang aṭangin zaithiam an fuan khawm a, band eng emaw zat an inlan bawk.

Model rual
Northeast Festival-ah hian India rama model ṭha ber ber te an inlan a, Lakme Fashion Week-a inlan phak te an ni nawk. Chung zingah chuan Janvi Deori leh Kenny Lory te pawh an tel a, beauty pegant lamah Femina Miss India Assam 2018, Sunaina Kamath chu a langsar viau bawk.

Miss India Tripura 2017 Rinky Chakma, Miss India Universe (runner up) 2016 Aradhana te chu mipui mitfukna an ni. Model rual zingah hian Mizo nula Jessica Z Hmar a tel bawk a, ani hi mipui lawm ber te zinga mi a ni. Jessica Z Hmar hi Spicejet cabin crew niin, Spicejet advertisement model a ni nghe nghe.