C. Lalhmingmawii 'Eldorado' acoustic version tichhuak dawn
Mizo hla lar chuai thei lo 'Eldorado' hla ngaina tute tan chanchin lawmawm tak a awm a, he hla sa lartu C. Lalhmingmawii ngeiin acosustic version-in a rawn siam thar leh ta. Zanin aṭangin YouTube lamah en tur a awm dawn a, Cable TV lamah erawh hmuh tur a awm dawn lo thung.
'Eldorado' chu...
Mizo hmeichhe zaithiam zinga hriat hlawh tak mai, C. Lalhmingmawii chuan kum 2000 khan 'Eldorado' hi a release a, a lar vet vet hle. Tun thleng pawha mi tam tak ngainat leh zaithiam te pawhin an la sak chhuah fo a ni.
He hla hi Mizo hla phuah thiam famta Biakdika (BD-a) phuah kha niin, C. Lalhmingmawi hian thiam tak maiin a rawn sa chhuak a ni. Tun ṭuma acoustic version pawh hi ngaihthlak a man hla leh pek hle a, a video pawh en manhla tak a ni.
C. Lalhmingmawii chuan, "He hla hi ka duh leh ngainat em em a ni a, lung pawh a tileng thar hle a ni. H. Rotluanga (Mapuia) thurawn min pek ang leh, a phuahtu a lo boral tawh bawk nen, amah hriatrengna ni pahfawmin ka siam thar leh ta a ni. Tunlai deuh hleka han tuaithar a chakawm bawk nen, acoustic version hian kan siam ta a ni," tiin a sawi.
C.Lalhmingmawii chuan sawi zawmin, "Mizo-te'n kan la tih tam vak loh ni mah se unplugged/acoustic version hian lung a len a, a hla nen pawh a inhmeh ve phianin ka hria," tiin a hla chungchang a sawi bawk.
Musician ṭha te nen...
'Eldorado' acoustic version-ah hian musician ṭha tak tak ten tha an thawh a, chung zingah chuan Ephraim-a leh Maenga te pawh an tel. A hla hi Foster Records-ah record a ni a, ngaihthlak a nuam hle. Video hi Mawitea Hauchhum (RDS Shots) kutchhuak niin, shooting hi MZU Auditorium-ah neih a ni.
C. Lalhmingmawii chuan, "Musician ṭha tak takin minpui a, video pawh kan uluk hle a, an inpekna-ah ka lawm takzet a ni. He hla hi ṭawngṭaina te chhang ṭhintu Pathian-in A ropuina puan chhuah nan a hman leh ka beisei a, ringtu nun khawhar leh chau fuih thartu nise tih hi ka ṭawngṭaina a ni," a ti.
BD-a hriatreng nan
Hla phuhthiam hriat hlawh tak BD-a hi kum 2009 khan a boral a, a hla phuah te hian sak a hlawh hle. Fakna hla bakah Lengzem thlenga phuah ṭhin a ni a, chung zingah chuan - Rebecca Saimawii sak 'Damna kim' te, Babulon ram atang hian (Saizikpuii Sailo), Halleluiah Amen (Daduhi), A na e (Mami Varte) leh C. Lalhmingmawii sak 'Eldorado' te hi a lar zual an ni.
'Eldorado' hi a satu C. Lalhmingmawii chuan rawn siam thar lehin, DB-a hriatreng nan a hlan a ni. Zanin hian C. Lalhmingmawii YouTube channel-ah upload a ni dawn a, Cable TV lamah chuan pek chhuah a ni dawn lo thung.